रंगपंचमीच्या उत्सवात मंत्री गिरीश महाजनांचा धप्पा!

‘फिरी फिरी नाच’ या खान्देशी गीतावर धरला ठेका

नाशिक ः प्रतिनिधी
नाशिकमधील रंगपंचमीसाठीची रहाड संस्कृती प्रसिद्ध आहे. नाशिककर उत्सवप्रिय असल्याने खास रंगपंचमीला (दि. 8 मार्च) रहाडीत डुंबण्याचा मोह जलसंपदा आणि कुंभमेळामंत्री गिरीश महाजन यांनाही आवरला नाही. शनी चौक परिसरातील पेशवेकालीन रहाडीत त्यांनी धप्पा मारत पारंपरिक पद्धतीने रंगपंचमी साजरी केली. यावेळी रंगपंचमीचा मनसोक्त आनंद लुटला. मंत्री महाजन यांच्यासह भाजपाच्या स्थानिक नेत्यांनीही हजेरी लावली होती. शहरातील विविध रहाडींत रंग खेळण्यासाठी नाशिककरांनी मोठी गर्दी केली होती.
जलसंपदा आणि कुंभमेळामंत्री गिरीश महाजन यांनी शहरातील विविध रहाडींवर रंगपंचमीचा आनंद घेतला. सिडको प्रभागातही नगरसेवक सुधाकर बडगुजर यांनी आयोजित केलेल्या वॉटर शोमध्येही ते सहभागी झाले होते. यावेळी महाजन यांनी खान्देशी गीतांवर ठेका धरला होता. तरुणाईने ’फिरी फिरी नाच’ या गीतावर ग्रुप डान्स करत रंगपंचमीचा आनंद लुटला.
संपूर्ण भारतात होळीनंतर दुसर्‍या दिवशी रंगपंचमी खेळली जाते; परंतु नाशिकमध्ये होळीनंतर पाच दिवसांनी येणार्‍या पंचमीला रंग खेळला जातो. जुने नाशिक, पंचवटी परिसरातील पेशवेकालीन रहाडींची रंगपंचमीला विशेष तयारी केली जाते. शहरात नऊ रहाडी आहेत. रंगपंचमीसाठी तरुणाईसह सर्वच जण उत्साही असतात.
पेशवेकाळापासून चालत आलेल्या रहाड परंपरेला रंगपंचमीच्या दिवशी मोठ्या उत्सवाचे स्वरूप येते. शहरातील विविध चौकांमध्ये पुरातन रहाडी खोदल्या जातात. त्याचे पूजन करून त्यात नैसर्गिक रंग भरले जातात. पाणी सोडले जाते. त्यानंतर रंगपंचमीच्या खेळाला सुरुवात होते. यावेळी शालिमार येथेही वॉटर शोचे आयोजन केले होते. यात सहभागी होण्यासाठी नाशिककरांनी गर्दी केली होती. अनेकांना रहाडीपर्यंत पोहोचणे गर्दीमुळे शक्य झाले नाही. त्यांंनी वॉटर शो, तसेच गोदावरी नदीत रंगपंचमीचा आनंद साजरा केला. यावेळी डीजे, पारंपरिक वाद्यांच्या तालावर तरुणाईसह आबालवृद्धांनी आनंद लुटला.

Minister Girish Mahajan’s surprise at the Rang Panchami festival!