कुत्रा शेतजमिनीतून गेल्याच्या वादातून गोळशीत एकाचा खून

दिंडोरी : प्रतिनिधी
पाळीव कुत्रा शेतजमिनीत गेल्याच्या वादातून एकाचा तीक्ष्ण हत्याराने वार करुन खून झाल्याची घटना तालुक्यातील गोळशी शिवारात घडली. याप्रकरणी दोन संशयितांविरोधात गुन्हा दाखल करण्यात आला आहे.
गोळशी शिवारातील टिभू पिंगळे यांचा पाळीव कुत्रा लगतच्या सुदाम मुळाणे यांच्या शेतजमिनीत गेल्याने पिंगळे व मुळाणे यांच्यात वाद उदभवला होता. त्यानंतर सत्यभामा पिंगळे या शेतीतून भेंडी काढत असताना सुदाम मुळाणे व रवींद्र मुळाणे या ठिकाणी आले व शिविगाळ करु लागले. यावेळी टीभु पिंगळे हे समजावून सांगत असताना रवींद्र मुळाणे याने टिभू पिंगळे यांच्यावर तीक्ष्ण हत्याराने वार केल्याने त्यांच्या डोक्यात व पोटात वर्मी वार लागल्याने ते गंभीर जखमी झाले होते. पिंगळे यांना नाशिक येथे उपचारार्थ दाखल केले असता त्यांचा मृत्यू झाला. सत्यभामा पिंगळे यांनी दिंडोरी पोलिसांत फिर्याद दिली असून, रवींद्र मुळाणे व सुदाम मुळाणे यांच्याविरोधात गुन्हा दाखल करण्यात आला आहे. याबाबत पोलिस निरीक्षक प्रमोद वाघ यांच्या मार्गदर्शनाखाली तपास सहाय्यक पोलिस निरीक्षक मोनिका जेजोड, हवालदार बाळासाहेब पजई करीत आहेत.