अतिरिक्त आयुक्तांच्या खुर्चीसाठी संगीत खेळ

चौधरी पद सोडत नसल्याने भदाणे यांची अडचण

नाशिक : प्रतिनिधी
मनपाचे अतिरिक्त आयुक्त प्रदीप चौधरी यांची नाशिक महापालिकेत दोन वर्षांच्या प्रतिनियुक्तीने नियुक्ती करण्यात आली होती. या आदेशानुसार प्रतिनियुक्तीचा कालावधी संपुष्टात आला असून, त्यांची प्रतिनियुक्ती संपुष्टात आणून त्यांच्या सेवा ग्रामविकास विभागाकडे वर्ग करण्यात येत असल्याचा आदेश 21 एप्रिल रोजी नगरविकास विभागाने जारी केला होता. दरम्यान ही खुर्ची चौधरी सोडण्यास तयार नसल्याचे चित्र आहे. परिणामी यावरून मोठा पेच निर्माण झाला आहे.यामागे कोणाचा दबाव आहे, असा सवाल केला जात आहे.
या आदेशात जिल्हा नियोजन अधिकारी नीलेश भदाणे यांची चौधरी यांच्या जागी अतिरिक्त आयुक्त या पदावर दोन वर्षे कालावधीकरिता प्रतिनियुक्तीने नियुक्ती करण्यात येत असल्याचे आदेशित करण्यात आले होते. मात्र, चौधरी खुर्ची सोडण्यास तयार नसल्याने मोठा पेच निर्माण झाला आहे. राज्य शासनाच्या नियोजन विभागाच्या अवर सचिव लतिका पाटील यांनी 1 जून रोजी आदेश जारी करत नीलेश भदाणे यांना अतिरिक्त आयुक्त या पदावर नगरविकास विभाग व सामान्य प्रशासन विभागाच्या शासन निर्णयानुसार दोन वर्षांच्या कालावधीकरिता प्रतिनियुक्तीने नियुक्ती करण्यात आली आहे. या पदावर हजर होण्याकरिता भदाणे यांना अर्थ व सांख्यिकी आयुक्तालय मुंबई येथून कार्यमुक्त करण्यात येत असल्याचे आदेशात म्हटले आहे.हे आदेश मनपाला 23 जून रोजी प्राप्त झाले आहेत. त्यानुसार भदाणे गेल्या आठवड्यात नाशिक मनपात हजर होण्यासाठी आले. मात्र, आयुक्त मनीषा खत्री यांनी त्यांना हजर करून न घेतल्याने भदाणे हे आल्या पावली माघारी फिरले. शासन आदेशाची अंमलबजावणी मनपा प्रशासनाकडून का केली जात नाही, असा प्रश्न उपस्थित केला जात आहे. दोन अधिकार्‍यांमधील खुर्चीचा हा वाद वा खेळ महापालिकेत सुरू आहे.
याबाबत आयुक्तांशी संपर्क साधण्याचा प्रयत्न केला असता त्यांच्याशी संपर्क होऊ शकला नाही.

नेमके कुणाचे वजन की दबाव?
अधिकार्‍यांच्या बदल्यांचा विषय हा नेहमीच बहुचर्चेचा विषय ठरतो. आताही नाशिक महापालिकेतील अतिरिक्त आयुक्त-1 या पदाच्या खुर्चीचा म्हणजेच बदलीचा विषय सध्या चांगलाच चर्चेत आहे. या पदावर सध्या प्रदीप चौधरी विराजमान आहेत. त्यांच्या जागेवर राज्य शासनाने नीलेश भदाणे या अधिकार्‍यांची प्रतिनियुक्तीने दोन वर्षांसाठी बदली केली आहे. मात्र, चौधरी खुर्ची सोडायला तयार नसल्यामुळे भदाणे खुर्चीसाठी महापालिकेत फेर्‍या मारत आहेत. गेल्या तीन ते चार वेळा भदाणे मनपात हजर होण्यासाठी आले. मात्र, त्यांना हजर करून घेण्यात आले नाही. यामुळे या प्रकरणामागे नेमके कुणाचे वजन वा दबाव आहे, असा प्रश्न उपस्थित होत आहे.

Musical chairs for the Additional Commissioner’s post