जिल्ह्यात 73.39 टक्के मतदारांचे मॅपिंग पूर्ण

7.92 लाख मतदारांमध्ये विसंगती

नाशिक : प्रतिनिधी
मतदारयादी शुद्धीकरण आणि निवडणूक प्रक्रिया अधिक पारदर्शक करण्यासाठी राबविण्यात येत असलेल्या घरनिहाय मतदार मॅपिंग मोहिमेत नाशिक जिल्ह्याने लक्षणीय प्रगती केली आहे. जिल्ह्यातील 51 लाख 8 हजार 912 पैकी 37 लाख 49 हजार 533 मतदारांचे मॅपिंग पूर्ण झाले आहे. हे प्रमाण 73.39 टक्के आहे. मात्र, अद्याप 13 लाख 59 हजार 379 मतदारांचे मॅपिंग बाकी आहे. सात लाख 92 हजार 135 मतदारांमध्ये विविध विसंगती आढळून आल्या आहेत.
जिल्ह्यातील 15 विधानसभा मतदारसंघांत ही मोहीम राबविण्यात येत आहे. सर्वाधिक मॅपिंग इगतपुरी मतदारसंघात 89.37 टक्के झाले. त्यापाठोपाठ बागलाण 87.30 टक्के, येवला 86.30 टक्के आणि चांदवड 85.44 टक्के या मतदारसंघांचा क्रमांक लागतो.
दुसरीकडे, नाशिक शहरातील मतदारसंघांत मॅपिंगची गती तुलनेने कमी असल्याचे दिसते. नाशिक मध्य मतदारसंघात केवळ 46.28 टक्के, तर नाशिक पश्चिममध्ये 52.19 टक्के व देवळाली मतदारसंघात 53.71 टक्के मॅपिंग झाले आहे. मतदारयादी अधिक अचूक व त्रुटीमुक्त करण्यासाठी निवडणूक विभागाकडून विशेष पडताळणी मोहीम सुरू आहे. उर्वरित मतदारांचे मॅपिंग लवकरच होईल.

मतदारांच्या इतर माहितीची पडताळणी
जिल्हाभरात सात लाख 92 हजार 135 मतदारांच्या नोंदींमध्ये विसंगती आढळली आहे. या प्रकरणांत पत्ता, घर क्रमांक, कुटुंबीय तपशील किंवा इतर माहितीची पडताळणी करण्यात येणार आहे.

इगतपुरी अव्वल, नाशिक मध्य सर्वांत मागे
मतदार मॅपिंगमध्ये इगतपुरी विधानसभा मतदारसंघ 89.37 टक्क्यांसह जिल्ह्यात प्रथम क्रमांकावर आहे. नाशिक मध्य मतदारसंघात केवळ 46.28 टक्के मॅपिंग पूर्ण झाल्याने हा मतदारसंघ तळाशी आहे.

Mapping of 73.39 percent of voters completed in the district.