नाशिकरोड कारागृह अधिकार्‍यांची संशयितासोबत कथित पार्टी

सोशल मीडियावर व्हिडिओ व्हायरल; प्रशासनाच्या कार्यपद्धतीबद्दल उलटसुलट चर्चा

नाशिकरोड : विशेष प्रतिनिधी
नाशिकरोड मध्यवर्ती कारागृहातील काही वरिष्ठ अधिकार्‍यांचा एका संशयितासोबत कथितरीत्या पार्टी करतानाचा व्हिडिओ सोशल मीडियावर व्हायरल झाल्याने कारागृह प्रशासनात चर्चेला उधाण आले आहे. संबंधित व्हिडिओमध्ये कारागृह परिसरातील शासकीय निवासस्थानासमोर काही अधिकारी व संशयित एकत्र दिसत असल्याचा दावा करण्यात येत आहे. या प्रकारामुळे प्रशासनाच्या कार्यपद्धतीबाबत विविध प्रश्न उपस्थित केले जात आहेत.
मिळालेल्या माहितीनुसार, संबंधित संशयित हा फसवणुकीच्या प्रकरणात यापूर्वी नाशिकरोड मध्यवर्ती कारागृहाशी संबंधित राहिलेला आहे. सध्या जामिनावर बाहेर असल्याचे सांगितले जात आहे. व्हायरल झालेल्या व्हिडिओमध्ये काही वरिष्ठ अधिकारी त्याच्यासोबत अनौपचारिक वातावरणात दिसून येत असल्याची चर्चा सुरू आहे. या कथित पार्टीदरम्यान मद्यपान झाल्याचाही दावा सोशल मीडियावर करण्यात येत आहे. मात्र, या सर्व बाबींना अधिकृत दुजोरा मिळालेला नाही. विशेष म्हणजे, हा प्रकार कारागृह परिसरातील शासकीय निवासस्थानाजवळ घडल्याचे बोलले जात असल्याने सुरक्षाव्यवस्था आणि शासकीय शिस्त यावरही प्रश्न उपस्थित होत आहेत. दरम्यान, संबंधित अधिकार्‍यांपैकी एका अधिकार्‍यावर यापूर्वीही प्रशासकीय स्तरावर कारवाई झाल्याची चर्चा कारागृह वर्तुळात सुरू आहे. त्यामुळे या संपूर्ण प्रकरणाची निष्पक्ष चौकशी करून सत्य समोर आणावे, अशी मागणी विविध स्तरांतून होत आहे. या प्रकरणाबाबत नाशिकरोड मध्यवर्ती कारागृहाच्या अधीक्षक अरुणा मुगुटराव यांच्याशी संपर्क होऊ शकला नाही. तसेच कारागृह प्रशासनाची अधिकृत भूमिका अद्याप समोर आलेली नसून संबंधित व्हिडिओची सत्यता, त्यामागील परिस्थिती आणि संबंधित व्यक्तींची भूमिका याबाबत चौकशीनंतरच स्पष्टता येणार असल्याचे बोलले जात आहे.

Nashik Road Jail officials allegedly party with suspect