एसटीत आजपासून महिला, ज्येष्ठ नागरिकांना एनसीएमसी कार्ड बंधनकारक

मुंबई :
राज्य परिवहन महामंडळाच्या (एसटी) बसमधून शासनाच्या सवलतीत प्रवास करणार्‍या महिला व 65 ते 75 वर्षे वयोगटातील ज्येष्ठ नागरिकांसाठी 1 सप्टेंबर 2026 पासून राष्ट्रीय सामान्य गतिशीलता कार्ड (एनसीएमसी) अनिवार्य करण्यात आले आहे. या निर्णयानुसार सवलतीचे तिकीट आता एनसीएमसी कार्डद्वारेच दिले जाणार आहे. दरम्यान, आतापर्यंत एक कोटी 11 लाख 78 हजार 90 प्रवाशांनी एनसीएमसी कार्डची नोंदणी केली आहे.
एसटी महामंडळाने दिलेल्या माहितीनुसार, शासनाच्या विविध सवलत योजनांचा लाभ घेणार्‍या प्रवाशांसाठी एनसीएमसी कार्ड नोंदणी व वितरणाचे काम सुरू असून, त्यासाठी ई-बिक्स टेक्नॉलॉजीज लिमिटेडची नियुक्ती करण्यात आली आहे. सध्या महिला व ज्येष्ठ नागरिकांची नोंदणी सुरू आहे. पुढील टप्प्यात इतर सवलतधारक प्रवाशांनाही ही सुविधा दिली जाईल.सवलतीचा लाभ 1 सप्टेंबरपासून घेण्यासाठी प्रवाशांनी एनसीएमसी कार्ड सोबत बाळगणे व त्यात आवश्यक रक्कम ‘टॉप-अप’ करून ठेवणे बंधनकारक आहे. यासंदर्भातील मानक कार्यप्रणाली (एसओपी) सर्व आगारांना पाठविण्यात आली आहे. महिला व ज्येष्ठ नागरिकांनी 1 सप्टेंबरपूर्वी जवळच्या एसटी आगारात जाऊन एनसीएमसी कार्डची नोंदणी, वितरण व ‘टॉप-अप’ची प्रक्रिया पूर्ण करून घ्यावी, असे आवाहन महामंडळाने केले आहे. 75 वर्षांवरील ‘अमृत ज्येष्ठ नागरिकां’साठी एनसीएमसी कार्ड सक्तीला तात्पुरती मुदतवाढ देण्यात आली आहे. अनेक ज्येष्ठ नागरिकांचे हाताचे ठसे उमटत नसल्याने नोंदणी प्रक्रियेत अडचणी
येत आहेत.

NCMC card mandatory for women and senior citizens on ST buses starting today.

Sheetal Nagpure

शीतल नागपुरे या गांवकरी मध्ये डिजिटल विभागात कार्यरत असून, १ वर्षापासून ऑनलाइन वृत्त संकलनाचे काम करत आहेत. त्या पदवीधर असून, त्यांना वाचनाची आवड आहे.