१ जुलैपर्यंत हरकती घेता येणार महापालिकेची प्रारूप मतदार यादी उद्या जाहीर होणार

नाशिक : प्रतिनिधी : नाशिक महानगरपालिकेसह राज्यातील १४ महानगरपालिकांच्या सार्वत्रिक निवडणुकांसाठी मतदार याद्या तयार करण्याचा कार्यक्रम जाहीर करण्यात आला आहे . त्यानुसार प्रभागनिहाय उद्या ( दि . २३ ) गुरुवारी प्रारूप मतदार याद्या प्रसिद्ध करण्यात येणार आहेत . मतदार यादी प्रसिद्ध झाल्यानंतर २३ जून ते १ जुलै या कालावधीत हरकती दाखल करता येणार आहेत .

राज्यातील नाशिकसह बृहन्मुंबई , ठाणे , नवी मुंबई , कल्याण डोंबिवली , उल्हासनगर , वसई विरार , पुणे , पिंपरी चिंचवड , सोलापूर , कोल्हापूर , अकोला , अमरावती व नागपूर या १४ मनपा निवडणुकीसाठी मतदार यादीच्या कार्यक्रमास व्यापक प्रसिद्धी देण्यात यावी , अशा सूचना निवडणूक आयोगाने मनपा आयुक्तांना केल्या आहेत . मतदार याद्या प्रसिद्ध होत असताना याबाबत मतदारांना मोठ्या प्रमाणावर अवगत करणे आवश्यक आहे . भारत निवडणूक आयोगाने तयार केलेल्या व ३१ मे २०२२ रोजी अस्तित्वात आलेल्या विधानसभा मतदारसंघाच्या मतदार याद्या या निवडणुकांसाठी ग्राह्य धरण्यात येणार आहेत . त्यावरून प्रभागनिहाय मतदार याद्या तयार करताना नवीन नावांचा समावेश करणे , नावे वगळणे इत्यादी स्वरूपाची कार्यवाही राज्य निवडणूक आयोगाकडून केली जात नाही . हरकती व सूचनांच्या अनुषंगाने केवळ मतदार याद्यांचे विभाजन करताना लेखनिकांकडून होणाऱ्या चुका , मतदाराचा चुकून प्रभाग बदलणे , विधानसभेच्या यादीत नाव असूनही प्रभागाच्या यादीत नाव नसणे आदीसंदर्भातील दुरुस्त्या करण्यात येतात . याबाबत मतदारांना माहिती होणे आवश्यक आहे . ही पार्श्वभूमी लक्षात घेता प्रभागनिहाय प्रारूप मतदार यादी तयार करण्याच्या कार्यक्रमास व्यापक प्रसिद्धी द्यावी , असेही आयोगाने म्हटले आहे . गेल्या काही दिवसांपासून नाशिक महापालिका निवडणुकीसाठी अंतिम प्रभागरचना जाहीर झाल्यानंतर पुढे महिला आरक्षण सोडत व आता मतदार याद्या प्रसिद्ध केल्या जाणार आहेत . या मतदार याद्यांमध्ये माजी नगरसेवक , पदाधिकाऱ्यांना आपल्या प्रभागातील मतदारांची नावे समजणार असून , त्या दृष्टीने त्यांना तयारी करता येणार आहे .

महापालिकेची प्रारूप मतदार यादी उद्या प्रसिद्ध होणार आहे . आयोगाकडून मतदार यादी प्रसिद्ध करण्यासाठी सूचना आलेल्या आहेत . प्रभागनिहाय जाहीर होणाऱ्या याद्यांत हरकती घेण्याची १ जुलैपर्यंत मुदत देण्यात आली आहे . मनोज घोडे – पाटील , उपायुक्त , प्रशासन

Ashvini Pande

अश्विनी पांडे या 2019 पासून पत्रकारितेत कार्यरत असून, सध्या दैनिक गांवकरीत ऑनलाइन कंटेंट क्रीएटर तसेच उपसंपादक म्हणून कार्यरत आहे. त्यांना राजकीय व सामाजिक, सांस्कृतिक विषयाचे सखोल ज्ञान असून, साहित्य संमेलन, राजकीय सभा, राजकारणातील घडामोडी या विषयावर त्यांनी विपुल लेखन केलेलं आहे. विज्ञान शाखे बरोबरच पत्रकारितेतील पदवी बरोबरच साहित्यातील पदव्यूत्तर पदवी त्यांनी प्राप्त केलेली आहे.पत्रकारितेतील योगदानाबद्दल त्यांना विविध सन्मानही प्राप्त झालेले आहेत.