नायलॉन मांजाचा फास; करकोचा जखमी

महावितरण कर्मचार्‍याची तत्परता, पक्षिमित्रांनी दिले जीवदान

सिन्नर : प्रतिनिधी
नायलॉन मांजाचा वाढता आणि बिनधास्त वापर पशुपक्ष्यांसाठी जीवघेणा ठरत असल्याचा गंभीर प्रकार पुन्हा एकदा उघडकीस आला आहे. सिन्नर येथील महावितरण कार्यालयाच्या वीजबिल भरणा केंद्राच्या परिसरात मंगळवारी (दि. 13) दुपारी अडीच वाजेच्या सुमारास नायलॉन मांजामुळे सफेद मानेचा करकोचा गंभीर जखमी झाला.
या घटनेत करकोचाचा डाव्या बाजूचा पंख नायलॉन मांजेमुळे कापला गेला आहे. मोठ्या प्रमाणात रक्तस्राव होत होता. उडता न आल्याने जखमी अवस्थेत असलेल्या या पक्ष्यावर मोकाट कुत्री हल्ला करण्याचा धोका होता. ही बाब लक्षात येताच महावितरण कार्यालयातील वीजबिल भरणा केंद्रावरील कर्मचारी सुनील लांडगे यांनी प्रसंगावधान राखत जखमी करकोचाला सुरक्षितरीत्या पकडले. पंखात अडकलेला नायलॉन मांजा काढून त्यांनी पक्ष्याला कुत्र्यांपासून वाचवले.
यानंतर लांडगे यांनी तत्काळ पक्षिमित्र राहुल कालेवार, शंतनु कोरडे व संदीप साठे यांच्याशी संपर्क साधला. माहिती मिळताच पक्षिमित्रांनी घटनास्थळी धाव घेत जखमी करकोचाला आपल्या ताब्यात घेतले. पुढे या पक्ष्याला वन विभागाच्या कर्मचार्‍यांच्या ताब्यात देण्यात आले. तेथे त्याच्यावर तातडीने उपचार सुरू करण्यात आले आहेत.
नायलॉन मांजावर कायद्याने बंदी असतानाही शहरात त्याचा वापर खुलेआम सुरू असल्याचे या घटनेतून पुन्हा अधोरेखित झाले आहे. मकरसंक्रांतीच्या पार्श्वभूमीवर पतंगोत्सवात नायलॉन मांजाचा वापर रोखण्यासाठी नगरपालिका व पोलीस प्रशासनाने विशेष पथके तयार करून कडक कारवाई करावी, अशी मागणी नागरिक व पर्यावरणप्रेमींकडून होत आहे.

नायलॉन मांजा येतो कुठून?

एकीकडे शहरात नायलॉन मांजा उपलब्ध नसल्याचा दावा केला जात असताना, मकरसंक्रांतीच्या पूर्वसंध्येला गल्लोगल्ली उडणार्‍या पतंगांना नायलॉन मांजा वापरला जात असल्याचे चित्र दिसत होते. त्यामुळे हा मांजा नेमका येतो कुठून? असा प्रश्न नागरिकांमधून उपस्थित झाला आहे. नायलॉन मांजामुळे माणसांसह पशुपक्षी जखमी होण्याच्या घटना सातत्याने घडत असताना, मुलांच्या हाती नायलॉन मांजा देणार्‍या पालकांवरही कठोर कारवाईची गरज व्यक्त केली जात आहे.

Nylon rope noose; Stork injured