राजापूर घाटात कंटेनर-लक्झरीच्या धडकेत एकाचा मृत्यू, 22 जखमी

नगरसूल : प्रतिनिधी
येवला-नांदगाव राज्यमार्ग क्रमांक 25 वरील राजापूर घाटातील धोकादायक वळणावर मंगळवारी (दि. 13) सकाळी कंटेनर आणि लक्झरी बसमध्ये समोरासमोर भीषण अपघात झाला. या अपघातात एकाचा जागीच मृत्यू झाला असून, सुमारे 20 ते 22 प्रवासी गंभीर जखमी झाले आहेत.
सकाळच्या वेळी घडलेल्या या दुर्घटनेची माहिती मिळताच राजापूरच्या पोलीसपाटलांसह स्थानिक ग्रामस्थांनी तत्काळ घटनास्थळी धाव घेऊन बचावकार्य सुरू केले. जखमींना तातडीने रुग्णवाहिकेने रुग्णालयात दाखल करण्यात आले. ग्रामस्थांच्या प्रसंगावधानामुळे मदतकार्याला गती मिळाली.
राजापूर घाटातील अरुंद रस्ता, अतिधोकादायक वळणे आणि सुरक्षा उपायांचा अभाव यांमुळे येथे वारंवार अपघात होत असल्याचे स्थानिकांनी सांगितले. प्रत्येक अपघातानंतर केवळ मदतकार्य होते, मात्र या धोकादायक वळणांवर कायमस्वरूपी उपाययोजना कधी होणार? असा संतप्त सवाल नागरिक उपस्थित करत आहेत. सार्वजनिक बांधकाम विभाग आणि वाहतूक पोलिसांनी या घाटाचे तातडीने सुरक्षा परीक्षण करून संरक्षक कठडे, दिशादर्शक व सावधानतेचे फलक लावावेत, तसेच वेगमर्यादा निश्चित करून रस्ते सुरक्षेच्या दृष्टीने ठोस पावले उचलावीत, अशी जोरदार मागणी होत आहे.

One dead, 22 injured in collision between container truck and luxury bus in Rajapur Ghat.