प्रवासी भरण्याच्या वादातून रिक्षाचालकाला मारहाण

गुंडाविरोधी पथकाने दोघांना पकडले

सिडको : प्रतिनिधी
रिक्षामध्ये प्रवासी भरण्याच्या वादावरून त्र्यंबक नाका सिग्नल परिसरात एका तरुणाला दगडाने मारहाण करून जीवे मारण्याचा प्रयत्न सुरू असताना गुंडाविरोधी पथकाच्या पोलिसांनी तत्काळ हस्तक्षेप केला. वाहतूक पोलिसांच्या मदतीने मारहाण करणार्‍या दोघांना ताब्यात घेण्यात आले. पोलिसांच्या वेळीच केलेल्या हस्तक्षेपामुळे जखमी तरुणाचे प्राण वाचविण्यात मदत झाली.
ही घटना 13 ऑक्टोबर रोजी सायंकाळी सुमारे 7.15 वाजेच्या सुमारास घडली. गुंडाविरोधी पथकाचे सहायक पोलीस उपनिरीक्षक सुनील आडके आणि पोलीस अंमलदार गुरू गांगुर्डे हे याच परिसरातून जात असताना त्यांना मारहाणीचा प्रकार दिसला. घटनेचे गांभीर्य ओळखून त्यांनी तातडीने घटनास्थळी थांबत वाहतूक विभागातील पोलिसांच्या मदतीने मारहाण करणार्‍यांना ताब्यात घेतले. जखमी प्रेम हिरे याला उपचारासाठी जिल्हा रुग्णालयात दाखल
करण्यात आले.
या प्रकरणी फिर्यादी दीपक संजय पाटील यांच्या तक्रारीवरून मुंबई नाका पोलीस ठाण्यात गुन्हा दाखल करण्यात आला आहे. या प्रकरणाचा पुढील तपास मुंबई नाका पोलीस करीत आहेत.
पोलीस आयुक्त संदीप कर्णिक, पोलीस उपायुक्त (गुन्हे) किरणकुमार चव्हाण आणि सहायक पोलीस आयुक्त (गुन्हे) संदीप मिटके यांच्या मार्गदर्शनाखाली गुंडाविरोधी पथकाने ही कारवाई केली. पथकाचे प्रभारी अधिकारी संदीप पवार यांच्यासह अन्य अधिकारी व पोलीस अंमलदारांनी या कारवाईत सहभाग घेतला.

Rickshaw driver assaulted over dispute regarding picking up passengers.