जिल्ह्याला आज ऑरेंज अलर्ट; गारपिटीचा इशारा

नाशिक : प्रतिनिधी
जिल्ह्यात पुढील चार दिवस पावसाळी वातावरण राहण्याची शक्यता हवामान खात्याने वर्तवली आहे. विशेषतः मंगळवारी (दि. 31) नाशिकसह घाट परिसरात ऑरेंज अलर्ट जारी करण्यात आला असून, नागरिक व शेतकर्‍यांना सतर्क राहण्याचे आवाहन करण्यात आले आहे. आयएमडीने हा अंदाज प्रसिद्ध केला आहे.
31 मार्च, 1 व 2 एप्रिल या तीन दिवसांसाठी यलो अलर्ट देण्यात आला आहे. या कालावधीत मेघगर्जना, विजांचा कडकडाट आणि ताशी 40 ते 50 किमी वेगाने वारे वाहण्याची शक्यता असून, काही ठिकाणी मध्यम स्वरूपाचा पाऊस पडू शकतो.
मंगळवारी ऑरेंज अलर्ट दरम्यान हवामान अधिक बिघडण्याची शक्यता असून, वार्‍याचा वेग 50 ते 60 किमी प्रतितासपर्यंत जाऊ शकतो. यासोबतच काही भागांत गारपीट होण्याची दाट शक्यता वर्तवण्यात आली आहे.

राज्यातही वादळी पावसाचा अंदाज

30 मार्चपासून राज्यात ढगाळ वातावरणासह दुपारनंतर वादळी पावसाचे सत्र सुरू होण्याची शक्यता आहे. खानदेश, मराठवाडा, पश्चिम विदर्भ आणि मध्य महाराष्ट्रातील घाट भागात विजांचा कडकडाट, वादळी वारे आणि गारपीटीचा इशारा देण्यात आला आहे. 31 मार्चला पावसाचे प्रमाण थोडे कमी होण्याची शक्यता असली तरी, 1 ते 4 एप्रिलदरम्यान पुन्हा वादळी पावसाची तीव्रता वाढू शकते.

शेतकर्‍यांना सतर्कतेचा इशारा
अवकाळी पाऊस व गारपीट यामुळे रब्बी हंगामातील काढणीला आलेली पिके आणि फळबागांना मोठा फटका बसू शकतो. त्यामुळे शेतकर्‍यांनी काढलेले धान्य सुरक्षित ठिकाणी साठवून ठेवावे किंवा झाकून ठेवावे, असा सल्ला कृषी विभागाने दिला आहे.

नागरिक व शेतकर्‍यांसाठी सूचना
विजा कडाडत असताना झाडाखाली उभे राहणे टाळावे.
मोकळ्या जागेत थांबू नये.
घराबाहेर पडताना हवामानाचा अंदाज तपासावा.
वादळी वार्‍यापासून स्वतःचा व जनावरांचा बचाव करावा.
वीज खांब, ट्रान्सफॉर्मर व तारा यांच्याजवळ जाणे टाळावे.

महत्त्वाचे अलर्ट
31 मार्च- ऑरेंज अलर्ट (वादळ व गारपीट शक्यता)
1 व 2 एप्रिल- यलो अलर्ट
वार्‍याचा वेग- 40 ते 60 किमी प्रतितास
मेघगर्जना, विजांचा कडकडाट, गारपीट शक्य.

Orange alert for the district today; Hail warning