चित्रकला शिक्षकास सात वर्षांचा कारावास

नाशिक : वार्ताहर

विद्यार्थिनीचा विनयभंग करणाऱ्या चित्रकला शिक्षकास न्यायालयाने सात वर्षांचा सश्रम कारावास व २० हजार रुपयांच्या दंडाची शिक्षा ठोठावली आहे. आरोपी अशोक रघुनाथ नागपुरे (वय ५७, रा. मिलेनियर पार्क, गजपंथ, म्हसरूळ) या शिक्षकाने विद्यार्थिनीच्या दुचाकीवर डबलसीट असताना फिर्यादीच्या मनास लज्जा उत्पन्न होईल, असे कृत्य केले. असाच अनुभव अन्य एका मैत्रिणीला आला असून, तिचा विनयभंग केल्याचा प्रकार सप्टेंबर २०१८ ते फेब्रुवारी २०२० दरम्यान वेळोवेळी घडला होता. या विद्यार्थिनीने शिक्षकाविरुद्ध पंचवटी पोलीस ठाण्यात तक्रार नोंदविली. पोलिसांनी भा. दं. वि. कलम ३५४, ३५४ (अ), ५०६ व बालकाचे लैंगिक अत्याचार प्रतिबंधक कायदा २०१२ च्या कलम ८ व १२ अन्वये गुन्हा दाखल केला होता. या प्रकरणी महिला पोलीस उपनिरीक्षक डी. एस. पाटील यांनी तपास करून जिल्हा व सत्र न्यायालय, नाशिक येथे दोषारोपपत्र दाखल केले. खटल्याचे कामकाज क्रमांक ३ च्या न्यायालयात चालून न्या. एम. व्ही. भाटिया यांनी वरील शिक्षा ठोठावली. या खटल्यात सहाय्यक सरकारी अभियोक्ता ॲड. सुलभा सांगळे व रेश्मा जाधव यांनी कामकाज पाहिले.

Ashvini Pande

अश्विनी पांडे या 2019 पासून पत्रकारितेत कार्यरत असून, सध्या दैनिक गांवकरीत ऑनलाइन कंटेंट क्रीएटर तसेच उपसंपादक म्हणून कार्यरत आहे. त्यांना राजकीय व सामाजिक, सांस्कृतिक विषयाचे सखोल ज्ञान असून, साहित्य संमेलन, राजकीय सभा, राजकारणातील घडामोडी या विषयावर त्यांनी विपुल लेखन केलेलं आहे. विज्ञान शाखे बरोबरच पत्रकारितेतील पदवी बरोबरच साहित्यातील पदव्यूत्तर पदवी त्यांनी प्राप्त केलेली आहे.पत्रकारितेतील योगदानाबद्दल त्यांना विविध सन्मानही प्राप्त झालेले आहेत.