विधान परिषदेसाठी शांततेत मतदान

11 जागांसाठी 22 ला मतमोजणी

मुंबई : प्रतिनिधी
महाराष्ट्र विधान परिषदेच्या स्थानिक स्वराज्य संस्था मतदारसंघाच्या रिक्त जागांसाठी गुरुवारी राज्यभरात उत्कंठापूर्ण वातावरणात मतदान पार पडले. केंद्रीय निवडणूक आयोगाने जाहीर केलेल्या कार्यक्रमानुसार सकाळी 8 वाजल्यापासून ते दुपारी 4 वाजेपर्यंत विविध मतदान केंद्रांवर मतदारांनी आपला हक्क बजावला. या निवडणुकीसाठी राज्यभरात विक्रमी मतदान झाले. नाशिक, भंडार्‍यात सर्वाधिक 100 टक्के मतदानाची नोंद झाली. राज्यातील स्थानिक स्वराज्य संस्थांमधील निवडणुका प्रलंबित असल्यामुळे दीर्घकाळापासून या जागा रिक्त होत्या, ज्यामुळे या वेळच्या निवडणुकीकडे संपूर्ण राज्याचे राजकीय लक्ष लागून राहिले होते. सर्वच मतदान केंद्रांवर चोख पोलीस बंदोबस्त तैनात करण्यात आल्याने मतदान प्रक्रिया अत्यंत शांततेत आणि सुरळीत पार पडली.
निवडणूक आयोगाने सुरुवातीला विधान परिषदेच्या एकूण 17 जागांसाठी (16 द्विवार्षिक आणि 1 पोटनिवडणूक) निवडणूक जाहीर केली होती. मात्र, राजकीय गणिते आणि व्यूहरचनेमुळे मतदानाची औपचारिकता पार पडण्यापूर्वीच महायुतीचे 6 उमेदवार बिनविरोध निवडून आले आहेत. यामध्ये ठाणे, यवतमाळ, रायगड-रत्नागिरी-सिंधुदुर्ग, पुणे, वर्धा-गडचिरोली-चंद्रपूर आणि अहिल्यानगर (अहमदनगर) या जागांचा समावेश असून, यामुळे सत्ताधारी गोटात आधीच उत्साहाचे वातावरण आहे. परिणामी, गुरुवारी प्रत्यक्षात उर्वरित 11 जागांसाठी मतदानाची रणधुमाळी पाहायला मिळाली. सोलापूर, जळगाव, नाशिक, नागपूर, सांगली-सातारा, नांदेड, अमरावती, भंडारा-गोंदिया, धाराशिव-लातूर-बीड, परभणी-हिंगोली आणि छत्रपती संभाजीनगर-जालना या 11 मतदारसंघांमध्ये चुरशीच्या लढती पाहायला मिळाल्या. अनेक ठिकाणी प्रमुख पक्षांच्या बंडखोरांनी अपक्ष म्हणून शड्डू ठोकल्याने या निवडणुका अधिकच रंगतदार बनल्या, त्यात काही ठिकाणी ऐनवेळी बंडखोरांनी माघार घेतली. अनेक ठिकाणी नगरसेवकांना पैसे दिले गेल्याचे, पळवापळवीचे आरोप झाले. काही ठिकाणी हॉटेल पॉलिटिक्स गाजले. अशा सर्व धामधुमीत गुरुवारी सीलबंद झालेले सर्व उमेदवारांचे राजकीय भवितव्य आता येत्या 22 जून रोजी होणार्‍या मतमोजणीनंतर स्पष्ट होणार आहे.

Peaceful voting for the Legislative Council.