पेट्रोल-डिझेल चोरी करणार्‍या टोळीचा पर्दाफाश

आठपैकी पाच संशयित आरोपींना महिनाभरानंतर अटक

मनमाड : प्रतिनिधी
मनमाड शहरातील भारत पेट्रोलियम कंपनीच्या मुंबई-मनमाड-बिजवासन या पेट्रोलियम पाइपलाइनला छिद्र पाडून त्यातून थेट नळकनेक्शन करून पेट्रोल-डिझेलची चोरी करणार्‍या या टोळीचा पर्दाफाश करण्यात पोलिसांना यश आले आहे.
मनमाड शहर नजीक असलेल्या भारत पेट्रोलियम कंपनीच्या अनकवाडे शिवारात मुंबई-मनमाड-बिजवासन पाइपलाइनला छिद्र पाडून पेट्रोल डिझेलची चोरी सुरू असल्याचे 6 मे रोजी उघडकीस आले होते. याप्रकरणी बी.पी.सी. एल. इन्टॉलेशन पानेवाडी येथील प्रबंधक अनुज धर्मराव यांच्या तक्रारीवरुन मनमाड शहर पोलीस ठाण्यात गुन्हा दाखल करण्यात आला होता.
गोपनीय व तांत्रिक माहितीच्या आधारे पोलिसांनी सुनील ऊर्फ सोनू जयशंकर तिवारी (वय 35, रा. कल्याण) कथुरायन ऊर्फ कार्तिक रामकृष्ण मुदलियार (वय 38, रा. गोवंडी, मुंबई) यांना अनकवाडे शिवारात एका पोल्ट्री फॉर्मजवळ शिताफीने ताब्यात घेतले. अधिक तपासात त्यानी मोहम्मद मकसूद अब्दुल वाहीद शेख (वय 40, गोवंडी मुंबई) इरफान याकुब मोमीन (रा. मनमाड), काकासाहेब शिवराम गरुड (रा. अनकवाडे) यांना मनमाड येथून ताब्यात घेतले.
या गुन्हातील वाहीद सदार सय्यद, (रा. गोवंडी, मुंबई), याकुब शेख, अमजद कुरेशी, (रा. मुंबई) यांची नांवे निष्पन्न झाली आहेत. या गुन्ह्यात आतापर्यंत आठ आरोपी निष्पन्न झाले असून, पाच आरोपीना अटक करण्यात आली आहे.

कंपनीतून कोणाची मदत?

भारत पेट्रोलियम कंपनीला मुंबईवरून पेट्रोलियम पाइपलाइनद्वारे इंधनपुरवठा होतो. ही पाइपलाइन अतिशय संवेदनशील असल्याने तिच्यावर ऑनलाइन नियंत्रण ठेवले जाते. विशेष म्हणजे, कंपनीच्या आतून एक थेंब इंधन चोरीला गेले किंवा वाया गेले तर अलार्म वाजतो. जीपीएसद्वारे लिकेज ठिकाण कळते. मग हा चोरीचा प्रकार घडत असताना कोणत्याही प्रकारचा अलार्म वाजला नाही का? किंवा या सर्व प्रक्रियेत कंपनीच्या आतून मदत होती का?
अधिकारी वर्गाच्या मदतीशिवाय ही चोरी शक्य नाही, असे मत या क्षेत्रातील जाणकारांनी व्यक्त केले आहे.