येवल्यात पतंग महोत्सवाची तयारी अंतिम टप्प्यात

बाजारपेठेत आकर्षक पतंग, दोरा, आसारी उपलब्ध; नायलॉन मांजावर बंदी कायम

येवला : विलास पगारे
मकरसंक्रांत सण काही दिवसांवर येऊन ठेपला आहे. यानिमित्त येवला शहरात 13 ते 15 जानेवारी रोजी सलग तीन दिवस पतंग महोत्सव साजरा करण्यात येणार आहे. या महोत्सवासाठी येवलेकर सज्ज झाले आहेत. शहरातील बाजारपेठेत विविध प्रकारचे आकर्षक पतंग, दोरा, आसारी विक्रीसाठी आले आहे. या सर्व साहित्यांनी बाजारपेठ सजली आहे.
पतंग महोत्सवाची तयारी अंतिम टप्प्यात आली आहे. यंदा मात्र नायलॉन मांजावर नगरपालिका आणि पोलिस प्रशासनाच्या वतीने बंदी घालण्यात आल्याने पतंग उडविताना नायलॉन मांजाचा वापर केला तर कडक कारवाईचा इशारा दिला आहे. प्रशासनातर्फे शहरात नायलॉन मांजाची विक्री करणार्‍यावर कडक कारवाई करण्यात येत आहे. बर्‍याच छुप्या विक्रेत्यांना समज देण्यात आली.
काही ठिकाणी प्रशासनाच्या वतीने नायलॉन मांजाची होळी करण्यात आली. शहरातील नागरिकांचा सर्वांत आवडता मकरसंक्रांत सण असल्याने यानिमित्ताने शहरात सलग तीन दिवस पतंग उडवून हा सण मोठ्या धूमधडाक्यात अन् फटाक्यांच्या आतषबाजीने साजरा करण्यात येतो. ही पतंग उडविण्याची परंपरा गेल्या शेकडो वर्षांपासून सुरू आहे आणि आजदेखील हा पतंग महोत्सव अधिक उत्साहात साजरा करण्यात येत असतोे. सलग तीन दिवस पतंग महोत्सव साजरा करण्यात येणार आहे. यानिमित्त शहरातील कारागिरांकडून विविध प्रकारचे आकर्षक पतंग तयार करण्यात येत आहेत. तसेच सहापाती, आठपाती आसरी तयार करण्यात येत आहे. कारागिरांचे काम अंतिम टप्यात आहे. शहरातील बाजारपेठेत विविध प्रकारचे आकर्षक पतंग, दोरा, अन् आसारी विक्रीला आले आहेत.
सदर वस्तूंच्या खरेदीसाठी प्रचंड गर्दी होत आहे. पतंग, दोरा, आसारींचे भाव गगनाला भिडले आहेत. महागाई मोठ्या प्रमाणात वाढले असतानादेखील वाढलेल्या या महागाईचा विचार न करता पतंग महोत्सवात येवलेकर सहभागी होत असतात. मात्र, यंदा बांबू तुटवड्यामुळे पतंग 10 टक्क्यांनी महागले. अतिवृष्टीमुळे बांबू वाहून गेल्याने उत्पादनावर परिणाम झाला आहे. मकरसंक्रांतीच्या पाच-सहा दिवस आधी ग्राहकांची पतंग दोरा अन् आसारी खरेदीसाठी मोठ्या प्रमाणात गर्दी होणार आहे.

यंदा नायलॉन मांजाचा वापर करू नये

येवला शहरात मकरसंक्रांतीच्या निमित्ताने पतंग महोत्सवाची तयारी अंतिम टप्प्यात आहे. येवलेकरांनी पतंग उडविताना नायलॉन मांजाचा वापर करू नये. हा नायलॉन मांजा माणसे, पक्ष्यांना घातक आहे. पतंग उडविताना उत्सवप्रेमींनी साध्या दोर्‍याचा वापर करून पतंग महोत्सवाची मजा लुटावी, असे आवाहन नगरपालिकेचे मुख्याधिकारी तुषार आहेर, शहर पोलिस ठाण्याचे पोलिस निरीक्षक अनिल भवारी यांनी केले आहे. पतंग उडविताना नायलॉन मांजाचा वापर झाल्यास कडक कारवाईचा इशारादेखील नगरपालिका आणि पोलिस प्रशासनाने नागरिकांना दिला आहे.

Preparations for the kite festival in Yeola are in the final stages.