पंतप्रधान मोदी अमेरिकेचे आदेश निमूटपणे ऐकतात : राहुल गांधींची टीका

तीन खलाशांच्या मृत्यूप्रकरणी अमेरिकेच्या निवेदनावर शशी थरूर यांचाही हल्लाबोल

नवी दिल्ली : प्रतिनिधी
ओमानच्या आखातात अमेरिकेच्या लष्कराने केलेल्या क्षेपणास्त्र हल्ल्यात ‘एमटी सेट्टेबेलो’ या व्यापारी जहाजावरील तीन निष्पाप भारतीय खलाशांचा दुर्दैवी मृत्यू झाला आहे. या मुद्द्यावरून काँग्रेस नेते राहुल गांधी यांनी पंतप्रधान नरेंद्र मोदी यांच्यावर सडकून टीका केली आहे.
तीन भारतीयांचा बळी जाऊनही अमेरिका कोणतीही माफी मागत नाही आणि भारताचे पंतप्रधान यावर कठोर भूमिका घेत नाहीत, यावर बोट ठेवत राहुल गांधी यांनी मोदींना लक्ष्य केले. आपले तडजोड करणारे पंतप्रधान एका ‘आज्ञाधारक सेवकासारखे’ निमूटपणे अमेरिकेचे आदेश ऐकत आहेत, असा घणाघाती आरोप राहुल गांधी यांनी केला आहे.
पंतप्रधान मोदी अमेरिकेच्या अध्यक्षांसोबतच्या आपल्या वैयक्तिक मैत्रीचा नेहमी गवगवा करतात, मात्र ती मैत्री भारतीयांचे प्राण वाचवण्यासाठी किंवा हक्क मिळवण्यासाठी कामी येत नाही, असे म्हणत काँग्रेसने केंद्र सरकारवर जोरदार हल्लाबोल केला आहे. इराणवरील नाकेबंदीच्या पार्श्वभूमीवर अमेरिकेने हे जहाज थांबवण्याचे आदेश दिले होते, मात्र जहाजाने सूचनांचे पालन न केल्याचा ठपका ठेवत अमेरिकेने ही कारवाई केली. या हल्ल्यात मृत्युमुखी पडलेले तीनही खलाशी भारतीय असून, या घटनेमुळे जागतिक स्तरावर मोठी खळबळ उडाली आहे. भारत सरकारने या घटनेचा तीव्र निषेध नोंदवला असला तरी, या मुद्द्यावरून आता देशांतर्गत राजकारण चांगलेच तापले असून, विरोधकांनी सरकारला धारेवर धरले आहे.

Prime Minister Modi meekly follows US orders: Rahul Gandhi’s criticism