भाजप गटनेत्यांकडून महापौर, उपमहापौर अर्ज खरेदी

मंगळवारपर्यंत अखेरची मुदत

नाशिक : प्रतिनिधी
नाशिक महापालिकेच्या महापौर व उपमहापौर पदाची निवड दि. 6 फेब्रुवारीला महासभेत केली जाणार आहे. प्रशासनाने या संदर्भातील कार्यक्रम जाहीर केला आहे. दरम्यान, मंगळवारी (दि. 3 फेब्रुवारी) अर्ज सादर करण्याची अखेरची मुदत आहे. शुक्रवारी (दि.30) भाजप गटनेते अ‍ॅड. श्याम बडोदे यांनी महापौर व उपमहापौर या दोन्ही पदांचे अर्ज खरेदी केले.
महापालिकेच्या महापौर व उपमहापौर निवडीचा विभागीय आयुक्तांनी कार्यक्रम निश्चित केला आहे. नाशिक महापालिकेची सार्वत्रिक निवडणुकीत भाजप व शिंदेसेना स्वबळावर लढली. यात भाजपने सर्वाधिक 72 जागा जिंकत एकहाती सत्ता मिळवली. शिंदेसेनेला अवघ्या 26 जागा वाट्याला आल्या. भाजप, उद्धवसेना, काँग्रेस व शिंदेसेनेने शुक्रवारी विभागीय आयुक्त कार्यालयात पक्षाची गटनोंदणी केली. भाजपने नगरसेवक अ‍ॅड. श्याम बडोदे यांची गटनेता म्हणून निवड केली आहे. शिंदेसेनेने अजय बोरस्ते, उद्धवसेनेने केशव पोरजे यांची गटनेतेपदी निवड केली आहे. काँग्रेसचे सूफी जीन गटनेतेपदी आहेत. राज्याच्या नगरसचिव विभागाने महापौर निवडीचा कार्यक्रम निश्चित करत 6 फेब्रुवारी रोजी महापौर व उपमहापौर निवडीचा कार्यक्रम जाहीर केला आहे. 3 फेब्रुवारीपर्यंत महापौरपदासाठी अर्ज विक्री व अर्ज स्वीकारण्यासाठी मुदत आहे.

भाजपच्या नगरसेविकेकडूनही अर्ज खरेदी

दरम्यान, एकीकडे भाजपचे गटनेते अ‍ॅड. श्याम बडोदे यांनी महापौर व उपमहापौर या दोन्ही पदांचे अर्ज खरेदी केले असताना, दुसरीकडे मात्र पंचवटीतील भाजपच्याच एका नगरसेविकेनेदेखील दोन्ही पदांचे अर्ज नेले आहेत. भाजपमध्ये स्वतंत्र अर्ज घेण्यामागचे कारण काय? यावरून चर्चा होते आहे.

Purchase of Mayor, Deputy Mayor applications from BJP group leaders