डांबून ठेवलेल्या 10 गोवंशांची सुटका

विधिसंघर्षित बालकासह एकजण ताब्यात

सिडको : प्रतिनिधी
कत्तलीच्या उद्देशाने कोणतीही चारापाण्याची व्यवस्था न करता गोठ्यात डांबून ठेवलेल्या दहा गोवंशांची सुटका करण्यात गुन्हे शाखा युनिट क्रमांक एकला यश आले आहे. याप्रकरणी एका इसमास ताब्यात घेण्यात आले आहे.एका विधिसंघर्षित बालकाचीही चौकशी करण्यात आली आहे.
गुन्हेशाखा युनिट क्रमांक 1 मधील पोलीस हवालदार विशाल काठे आणि पोलीस अंमलदार अमोल कोष्टी यांना मिळालेल्या गोपनीय माहितीच्या आधारे कमलवाडी-निमसे मळा परिसरातील एका गोठ्यावर छापा टाकण्यात आला.
वरिष्ठ पोलीस निरीक्षक डॉ. अंचल मुदगल यांच्या मार्गदर्शनाखाली पोलीस उपनिरीक्षक चेतन श्रीवंत, पोलीस हवालदार विशाल काठे, प्रदीप म्हसदे, विशाल देवरे, मिलिंदसिंग परदेशी, संदीप भांड तसेच पोलीस अंमलदार अमोल कोष्टी, मुक्तार शेख व समाधान पवार यांच्या पथकाने ही कारवाई केली. छाप्यादरम्यान गोठ्यात दहा गोवंश जनावरे बांधून ठेवलेली आढळली. जनावरांसाठी चारापाण्याची कोणतीही व्यवस्था नसल्याचे निदर्शनास आले. पोलिसांनी काल्या उर्फ इर्शाद अब्दुल रहमान कुरेशी (वय 38, रा. दिंडोरी रोड, नाशिक) यास ताब्यात घेतले. चौकशीदरम्यान ही जनावरे अन्य व्यक्ती आणि एका विधिसंघर्षित बालकाकडून आणण्यात आल्याची माहिती समोर आली.
संबंधित बालकाची चौकशी केली असता ही जनावरे कत्तलीसाठी संगमनेर येथे नेण्यात येणार होती. या कारवाईत सुमारे एक लाख 90 हजार रुपये किमतीच्या दहा गोवंशांची सुटका करण्यात आली. सुटका केलेली जनावरे तपोवन येथील कृषी गोसेवा ट्रस्टकडे संगोपनासाठी सुपूर्द करण्यात आली आहेत. याप्रकरणी गुन्हा दाखल करण्यात आला.पुढील तपासासाठी संशयितास आडगाव पोलीस ठाण्याच्या ताब्यात देण्यात आले आहे.

Rescue of 10 confined cattle