चांदवडजवळ ‘छोटा हत्ती’ टेम्पोच्या धडकेत एका विद्यार्थ्यांचा मृत्यू

चांदवडजवळ ‘छोटा हत्ती’ टेम्पोच्या धडकेत  शाळकरी विद्यार्थ्यांचा मृत्यू; शिक्षणमंत्र्यांनी घेतली जखमींची भेट
चांदवड, वार्ताहर

: मुंबई-आग्रा महामार्गावरील चांदवड तालुक्यातील सोग्रस फाटा येथे आज दुपारी एक भीषण अपघात झाला. भरधाव वेगाने येणाऱ्या ‘छोटा हत्ती’ टेम्पोने रस्ता ओलांडत असलेल्या शाळकरी मुलांना चिरडले. या अपघातात एका विद्यार्थ्यांचा जागीच मृत्यू झाला आहे.
या दुर्घटनेत १० ते १२ विद्यार्थी जखमी झाले असून, त्यापैकी काहींची प्रकृती गंभीर आहे. जखमींना तात्काळ चांदवड उपजिल्हा रुग्णालयात दाखल करण्यात आले आहे. या घटनेची माहिती मिळताच राज्याचे शालेय शिक्षणमंत्री दादा भुसे यांनी रुग्णालयात धाव घेऊन जखमींची विचारपूस केली आणि डॉक्टरांना आवश्यक उपचारांच्या सूचना दिल्या.
प्राथमिक माहितीनुसार, टेम्पो चालक दारूच्या नशेत होता. पोलिसांनी त्याला ताब्यात घेतले असून पुढील तपास सुरू आहे. या घटनेमुळे विद्यार्थ्यांच्या सुरक्षिततेचा प्रश्न पुन्हा एकदा ऐरणीवर आला आहे.