माध्यमिक शिक्षणाला मिळणार बळ

708 शिक्षकांची होणार भरती; पवित्र पोर्टलद्वारे प्रक्रिया

नाशिक : प्रतिनिधी
जिल्ह्यातील माध्यमिक शाळांमधील शिक्षकांची रिक्त पदे भरण्याच्या प्रक्रियेला आता वेग आला आहे. एकूण एक हजार 85 रिक्त पदांपैकी 708 पदांची जाहिरात प्रसिद्ध करण्यात आली आहे. ही पदे पवित्र पोर्टलच्या माध्यमातून भरण्यात येत आहेत. गुणवत्तापूर्ण शिक्षक उपलब्ध झाल्याने माध्यमिक शिक्षणव्यवस्थेला अधिक बळ मिळणार आहे.
पवित्र पोर्टलमार्फत झालेल्या भरती प्रक्रियेत गणित व विज्ञान विषयातील पदवीधर 249, भाषा विषयातील पदवीधर 112 आणि प्राथमिक शिक्षक 357, अशा एकूण 718 उमेदवारांची निवड यादी प्राप्त झाली आहे. संबंधित उमेदवारांच्या कागदपत्रांची पडताळणी 2 ते 4 सप्टेंबर या कालावधीत करण्यात येणार आहे. त्यानंतर पात्र उमेदवारांना 7 ते 11 सप्टेंबरदरम्यान समुपदेशनाच्या माध्यमातून नियुक्ती देण्यात येणार आहे.
दरम्यान, इयत्ता दहावीच्या विषयवार गुणवत्तावाढीसाठी जिल्हा तसेच राज्यस्तरावर विषय शिक्षकांचे गट तयार करण्यात आले आहेत. या गटांच्या माध्यमातून विषय शिक्षकांना सातत्याने विविध शैक्षणिक माहिती, अध्यापनातील नावीन्यपूर्ण पद्धती, तसेच गुणवत्तावाढीसाठी आवश्यक मार्गदर्शन उपलब्ध करून दिले जात आहे. इयत्ता दहावीच्या विद्यार्थ्यांच्या अध्ययन निष्पत्तीमध्ये सुधारणा करण्यासाठी वार्षिक तपासणीच्या माध्यमातून विषयवार संपादणूक तपासणी केली जात आहे. विद्यार्थ्यांच्या शैक्षणिक प्रगतीचे विश्लेषण करून आवश्यक त्या सुधारणा करण्यासाठी संबंधित विषय शिक्षकांना निर्देश दिले जात आहेत. त्यामुळे केवळ शिक्षकांची संख्या वाढविण्याबरोबरच अध्यापनाची गुणवत्ता आणि विद्यार्थ्यांची शैक्षणिक संपादणूक वाढविण्यावरही प्रशासनाचा भर असल्याचे दिसून येत आहे.
रिक्त शिक्षक पदांची भरती, विषय शिक्षकांचे मार्गदर्शन गट आणि विषयवार संपादणूक तपासणी या तिन्ही स्तरांवर सुरू असलेल्या प्रयत्नांमुळे माध्यमिक शिक्षणाची गुणवत्ता सुधारण्यास मदत होणार आहे. विशेषतः गणित, विज्ञान आणि भाषा विषयांसाठी उपलब्ध होणारे अतिरिक्त मनुष्यबळ विद्यार्थ्यांच्या शैक्षणिक गुणवत्तावाढीसाठी महत्त्वपूर्ण ठरणार आहे.
पवित्र पोर्टलवरील भरती प्रक्रियेनंतर माध्यमिक शाळांना आवश्यक शिक्षक उपलब्ध होऊन अध्यापनातील मनुष्यबळाची कमतरता दूर होण्यास हातभार लागणार आहे. इयत्ता दहावीच्या गुणवत्तावाढीच्या प्रयत्नांनाही यामुळे अधिक गती मिळणार आहे.

Secondary education to get a boost