सिन्नर तहसीलचे कामकाज दुसर्‍या दिवशीही संपामुळे ठप्प

65 तलाठ्यांसह अनेक कर्मचार्‍यांचा सहभाग; महसुलावर परिणाम

सिन्नर : प्रतिनिधी
जुनी पेन्शन योजना लागू करावी, सेवानिवृत्तीचे वय 60 वर्षे करावे यांसह विविध मागण्यांसाठी शासकीय कर्मचार्‍यांनी पुकारलेल्या संपाच्या दुसर्‍या दिवशी सिन्नर येथील महसूल विभागाच्या कामकाजावर परिणाम झाला. त्यामुळे तहसील कार्यालयातील बहुतांश कामकाज ठप्प झाले.विविध कामांसाठी आलेल्या नागरिकांना निराश होऊन परत जावे लागत आहे.
या संपात 65 तलाठी, 12 मंडळ अधिकारी, 8 लिपिक, 9 अव्वल कारकून, पाच शिपाई आणि एक वाहनचालक सहभागी झाले आहेत. त्यामुळे महसूल विभागाची नियमित कामे ठप्प झाली आहेत. मात्र, निवडणुकीसंदर्भातील कामकाज सुरू ठेवण्यात आले आहे.
दरम्यान, तहसीलदार सुरेंद्र देशमुख, नायब तहसीलदार सागर मुंदडा, महसूल नायब तहसीलदार माणिक गाडे, निवडणूक नायब तहसीलदार संजय गाडे, तसेच पुरवठा निरीक्षण अधिकारी विवेक जमधडे हे अधिकारी कामावर उपस्थित होते. त्यांनी तहसील कार्यालयात आलेल्या नागरिकांच्या शंकांचे निरसन केले. मात्र, कर्मचारी संपावर असल्याने अनेक कामे होऊ शकली नाहीत.
सिन्नर-1 आणि सिन्नर-2 ही दोन्ही सबरजिस्ट्रार कार्यालये दुसर्‍या दिवशीही बंद असल्याने दस्त नोंदणीचे काम पूर्णपणे ठप्प झाले. परिणामी शासनाच्या महसुलात मोठ्या प्रमाणात तूट झाल्याची माहिती मिळाली आहे.

Sinnar Tehsil’s work remains disrupted for the second day due to strike