सिन्नरकरांवर ऐन दिवाळीत पाणीटंचाईचे संकट

भाजपाचे मुख्याधिकार्‍यांना निवेदन; तत्काळ उपाययोजना करण्याची मागणी

सिन्नर ः प्रतिनिधी
सिन्नर शहरासाठी राज्याचे क्रीडा व युवक कल्याण मंत्री माणिकराव कोकाटे यांच्या संकल्पनेतून 100 कोटींच्या निधीतून राबविण्यात आलेली कडवा धरणावरील पाणीपुरवठा योजनेचा ट्रान्स्फॉर्मर नादुरुस्त झाल्याने तसेच पर्यायी ट्रान्स्फॉर्मर नसल्याने शहरवासीयांवर ऐन दिवाळीत पिण्याच्या पाणीटंचाईचे संकट उभे ठाकले असून, नगरपालिका प्रशासनाने तत्काळ उपाययोजना करून पाणीपुरवठा सुरळीत करण्याची मागणी सिन्नर तालुका भाजपाच्या वतीने मुख्याधिकारी अभिजित कदम यांच्याकडे निवेदनाद्वारे करण्यात आली आहे.
ना. कोकाटे यांच्या प्रयत्नातून 100 कोटींची कडवा धरणातून पाणीपुरवठा योजना मंजूर झाली. परंतु, पहिल्या दिवसापासून भ्रष्टाचारात अडकली. कुणी किती पैसे खाल्ले, याची चर्चा गावभर झाली. अनेक अडथळे पार करीत एकदाची योजना पूर्ण होऊन पाणी यायला लागले. परंतु, लगेच पाइप फुटू लागले, शेतकर्‍यांच्या शेतात पाणी जाऊ लागले. शिवडे गावाजवळ पाइपला गळती लागून बंधारा भरू लागला.
स्वतंत्र वीज मिळाल्यावर आता ट्रान्स्फॉर्मर जळू लागले. नगरपालिका एवढी सक्षम की, पर्यायी व्यवस्था नाही. यांच्या खेळात जनता होरपळून निघाली आहे. सुरुवातीला दोन -तीन दिवसांनी पुरवठा केला जात होता आता तर तो सहा-सात दिवसांवर येऊन पोहोचला आहे. यामुळे ऐन दिवाळीच्या पर्वात नागरिकांची पाण्यासाठी वणवण सुरू झाली आहे.
तांत्रिक अडचणी दूर करण्यासाठी एवढा मोठा कालावधी लागणे हे कितपत योग्य आहे? पाणीपट्टी वसुलीसाठी नगरपालिका ज्या पद्धतीने तगादा लावते, त्याच तत्परतेने पाणीपुरवठा का केला
जात नाही.
24 तास पाणीपुरवठा करणारी महत्त्वाकांक्षी योजना जर सदोष असेल तर ठेकेदारावर कारवाई का केली जात नाही? असे प्रश्न निवेदनाद्वारे उपस्थित करण्यात आले आहे. मुख्याधिकार्‍यांनी शहरवासीयांची होणारी गैरसोय टाळण्यासाठी तत्काळ उपाययोजना करून पाणीपुरवठा सुरळीत करावा, अशी मागणी करण्यात आली आहे.
यावेळी भाजपाचे नेते तथा माजी उपनगराध्यक्ष बाळासाहेब हांडे, देवयानी वाघ, चव्हाण, मुकुद खर्जे, डॉ. दीपककुमार श्रीमाली, किशोर देशमुख,
प्रमोद उगले, नाना बाबर, संतोष चव्हाण, गंगाराम खैरे, पोपटराव पगार आदींसह भाजपाचे पदाधिकारी व कार्यकर्ते
उपस्थित होते.