आला उन्हाळा, तब्येत सांभाळा!

नाशिक ः प्रतिनिधी
एप्रिलच्या मध्यावधीत नाशिकच्या तापमानाने चाळिशी गाठली आहे. उन्हाच्या तीव्र झळांनी जीवाची लाही-लाही होत आहे. उन्हाळा सुसह्य करण्यासाठी तज्ज्ञांनी शरीराला हायडे्रट ठेवण्याचा सल्ला दिला आहे.
नाशिक पूर्वी थंड हवेचे ठिकाण म्हणून ओळखले जायचे; परंतु गेल्या काही वर्षांपासून नाशिकची हवा तापते आहे. परिणामी, उन्हाळा असह्य होत असून, प्रचंड उकाडा जाणवत आहे. त्यामुळे उन्हाळ्याचा अनेकांना त्रास होतो. उन्हाळ्यात पाण्याची कमतरता भासू नये, शरीरात डिहायड्रेशन होऊ नये म्हणून पाणीदार पदाथार्र्ंसह नैसर्गिक फळे व पेयांचा आस्वाद घेत उन्हाळ्याला सामोरे जावे, असे तज्ज्ञांचे
मत आहे.
उन्हाळा सुरू झाला आहे. बर्‍याच जणांना उन्हाळ्यात विविध त्रास होतो. जसे की, उन्हाळी लागणे, अति गरम होणे, घाम येणे, अस्वस्थ वाटणे, उन्हाळ्यात वाढत्या तापमानामुळे खूप तहान लागते.
आयुर्वेदनानुसार, उन्हाळा हा पित्ताचा ऋतू आहे. या काळात आपली पचनशक्ती मंदावते आणि भूकदेखील कमी होते. त्यामुळेच या तीन दोषांचे योग्य संतुलन राखण्यासाठी योग्य प्रकारचा आहार घेणे फार महत्त्वाचे ठरते. उन्हाळ्यात बहुतांश वेळेला आपण एरेटेड कोल्ड्रिंक्स, आइस्ड टी व थंडगार पाणी यांसारख्या थंड ड्रिंक्सना प्राधान्य देतो.
या काळात तुम्ही उसाचा रस, दही, ताक, नारळपाणी, काकडी, कलिंगड, कच्चा आंबा, कैरीचे पन्हे, सोलकढी, थंडाई, ताक, सरबते आदी तुम्हाला डिहायड्रेशन होण्यापासून वाचवतील. शिवाय, हे पदार्थ अल्कलाइन गुणधर्माचे असल्यामुळे शरीरातील पीएच संतुलन राखण्यास त्याची प्रचंड मदत होते. त्यामुळे शरीराला उन्हाळ्याच्या दिवसांत हायड्रेट ठेवल्यास उकाड्याचा त्रास कमी होईल.

अत्यंत थंड ड्रिंक्सचे सेवन करू नये. कारण ते तुमच्या शरीरातील पाचक अग्नी विझवतात. तुम्ही तळलेले, जड किंवा अत्यंत मसालेदार किंवा खारट पदार्थदेखील टाळावेत. कारण ते पचायला जड असतात. त्याऐवजी पचायला हलके असलेले पदार्थ खाण्याचा प्रयत्न करा. जेणेकरून या उन्हाळ्यात तुम्ही हलके व आनंदी राहू शकाल. – क्षितिजा गायकवाड, आहारतज्ज्ञ, एम.एस्सी.
(फूड सायन्स अँड न्यूट्रिशन)

या पेयांसोबत होईल उन्हाळा सुसह्य

थंडाई ः पारंपरिक थंडाई दूध बदाम, केशर, गुलाबजल आणि वेलची आणि एका जातीची बडीशेप यांसारख्या मसाल्यांनी बनलेली असते.
ताक ः दही, पाणी व चिमूटभर मीठ मिसळून ताक बनवले जाते. बहुतेकदा जिरे व धणे वापरून चवीनुसार बनवलेले असते. ते त्याच्या पाचक फायद्यासाठी ओळखले जाते. शरीराला ते थंड करण्यास आणि निर्जलीकरण रोखण्यास मदत करते. विशेषतः गरम हवामानात चांगले ठरते.
सरबत ः फळे किंवा फुलांपासून गोड चवीचे सरबत बनवले जाते. सरबत थंड पाण्यात मिसळले जाते. ते बहुतेकदा गुलाब, संत्री किंवा लिंबाच्या चवीने बनवले जाते. हे थंड व हायड्रेटिंग पेय तुम्हाला दिवसभर ताजेतवाने ठेवू शकते.
लिंबू-पाणी ः लिंबू-पाण्यात लिंबाचा ताजा रस आणि चिमूटभर मीठ असलेले पाणी असते. हे एक हायड्रेटिंग पेय आहे, जे विषारी पदार्थ काढून टाकण्यास मदत करते व तुम्हाला ताजेतवाने वाटते.

Summer is here, take care of your health!