टार्गेट करिअर अकॅडमीत घुसून संचालकास मारहाण

5 हजारांची रोकड लांबवली

सिडको : विशेष प्रतिनिधी
उपनगर पोलीस ठाण्याच्या हद्दीतील टार्गेट करिअर अकॅडमीमध्ये घुसून चार जणांच्या टोळक्याने संचालकास मारहाण करत शिवीगाळ केली असून, ऑफिसच्या ड्रॉवरमधील 5 हजार रुपयांची रोकड लंपास केल्याची घटना समोर आली आहे. या प्रकरणी उपनगर पोलीस ठाण्यात गुन्हा दाखल करण्यात आला असून, आरोपींचा शोध
सुरू आहे.
या घटनेतील फिर्यादी अनिल कचरू गायखे (वय 49, रा. गायखे कॉलनी, दत्त मंदिर स्टॉप, नाशिक रोड) हे टार्गेट करिअर अकॅडमीचे संचालक असून, त्यांचे धोंगडे पॉइंट, जगताप मळा येथे ऑफिस आहे. दि. 28 मे 2025 रोजी सकाळी साडेदहाच्या सुमारास आरोपी संदीप नलगे, त्याचा भाऊ, अथर्व गवंदर व विनय सकला यांच्यासह चौघे व्यक्ती ऑफिसमध्ये जबरदस्तीने घुसले. अकॅडमीच्या भाडेकरारावरून वाद निर्माण करून फिर्यादी यांच्याकडे जास्तीची रक्कम
मागितली.
फिर्यादी अनिल गायखे यांनी पैसे देण्यास नकार दिल्यानंतर आरोपींनी त्यांना शिवीगाळ करत लाथाबुक्क्यांनी मारहाण केली. यामध्ये विनोद सकला याने हातातील ‘फायटर’ या वस्तूने अनिल गायखे यांच्या डोक्यावर घाव घालून त्यांना जखमी केले. यानंतर आरोपी संदीप नलगे याने ऑफिसच्या टेबलमधील ड्रॉवरमधून 5,000 रुपये रोख रक्कम उचलून नेली. याप्रकरणी उपनगर पोलीस ठाण्यात गुन्हा दाखल करण्यात आला असून, पुढील तपास उपनगर पोलीस ठाण्याचे वरिष्ठ पोलीस निरीक्षक जितेंद्र सपकाळे यांच्या मार्गदर्शनाखाली सपोनि वायकर व पोउपनि सोनवणे
करीत आहेत.