तिकीटदर पाच रुपयांच्या पटीत; निफाड-नाशिक 95, लासलगाव-नाशिक 130 रुपये
निफाड : विशेष प्रतिनिधी
एसटी बसच्या तिकिटासाठी एक-दोन रुपयांची चिल्लर नसल्याने प्रवासी आणि वाहक यांच्यात वारंवार होणार्या वादाला अखेर पूर्णविराम मिळाला आहे. महाराष्ट्र राज्य मार्ग परिवहन महामंडळाने (एसटी) 13 टक्के भाडेवाढ लागू करतानाच तिकीटदर पाच रुपयांच्या पटीत निश्चित करण्याचा महत्त्वपूर्ण निर्णय घेतला आहे. त्यामुळे तिकीट काढताना सुट्ट्या पैशांवरून होणारा गोंधळ कमी झाला असून, प्रवासी आणि वाहक दोघांनाही मोठा दिलासा मिळाला आहे.
राज्याचे परिवहन मंत्री प्रताप सरनाईक यांनी नव्या तिकीटदरांची घोषणा करताना सर्व तिकीटदर पाच रुपयांच्या पटीत निश्चित केल्याचे स्पष्ट केले होते. या निर्णयामुळे तिकीट वितरणाची प्रक्रिया अधिक सुलभ होत आहे. नवीन दरानुसार निफाड ते नाशिक प्रवासासाठी आता 95 रुपये, लासलगाव ते नाशिक प्रवासासाठी 130 रुपये, तर येवला ते नाशिक प्रवासासाठी 190 रुपये भाडे आकारले जात आहे. दरम्यान, बसस्थानके आणि बसमधील स्वच्छता राखण्यासाठी 15 एप्रिलपासून आकारण्यात येणारा दोन रुपयांचा अधिभार आता मूळ तिकीटदरातच समाविष्ट केला आहे. एसटी प्रशासनाने स्टेजनिहाय तिकीटदर निश्चित करताना प्रवाशांना सोयीचे गणित ठेवले आहे. नियमानुसार एखाद्या मार्गाचे भाडे 22 रुपये होत असल्यास प्रत्यक्षात 20 रुपये आकारले जातील, तर 23 रुपये भाडे होत असल्यास 25 रुपये आकारले जात आहे. अशा प्रकारे सर्व तिकीटदर पाच रुपयांच्या पटीत निश्चित केले आहेत. मात्र, अमृत ज्येष्ठ नागरिक योजनेंतर्गत शंभर टक्के प्रवास सवलत मिळणार्या ज्येष्ठ नागरिकांना दोन रुपयांचा स्वच्छता अधिभार स्वतंत्रपणे भरावा लागणार असल्याचे एसटी महामंडळाने स्पष्ट केले आहे.
नव्या तिकीट पद्धतीमुळे सुट्ट्या पैशांवरून होणारे वाद, प्रवाशांचा वेळेचा अपव्यय आणि वाहकांवरील ताण कमी होईल, अशी अपेक्षा एसटी प्रशासनाकडून व्यक्त केली जात आहे. निफाड, लासलगाव, येवला आणि नाशिक परिसरातील हजारो नियमित प्रवाशांना या निर्णयाचा थेट लाभ मिळणार असून, एसटीच्या प्रवासात अधिक सुलभता आणि शिस्त येण्यास मदत होणार आहे. – प्रशांत गुंड, आगार व्यवस्थापक
The hassle of small change during ST travel is over.