व्याजाच्या रकमेसाठी सावकाराने ठेवले डांबून

नाशिकरोड येथील धक्कादायक प्रकार; पाच जणांविरुद्ध गुन्हा दाखल

सिडको : विशेष प्रतिनिधी
नाशिकरोड परिसरात अवैध सावकारी, जबरदस्तीने डांबून ठेवणे, मारहाण व खंडणी वसुली केल्याचा गंभीर प्रकार उघडकीस आला आहे. याप्रकरणी उपनगर पोलीस ठाण्यात पाच जणांविरोधात गुन्हा दाखल करण्यात आला आहे.
साहेबराव दगा पानपाटील (वय 53, रा. रामनगर, कळवण, जि. नाशिक) यांनी दिलेल्या तक्रारीनुसार, सन 2016 मध्ये हॉटेल व्यवसाय सुरू करण्यासाठी त्यांनी चंद्रशेखर ऊर्फ पिंटू शिंदे (रा. नाशिकरोड) यांच्याकडून एक लाख रुपये कर्ज घेतले होते. दरमहा दहा टक्के व्याजाने घेतलेली मूळ रक्कम एप्रिल 2017 मध्ये पूर्ण फेड करण्यात आली होती. मात्र, उर्वरित व्याज पुढील दोन महिन्यांत देण्याचे सांगूनही आरोपीने फिर्यादीकडून घेतलेल्या कोर्‍या धनादेशांपैकी एक धनादेश बँकेत टाकून तो बाउन्स करून फिर्यादीविरोधात नाशिकरोड न्यायालयात खटला दाखल केला.
तक्रारीनुसार, व्याजाची रक्कम वसूल करण्यासाठी 13 जून 2025 रोजी आरोपी चंद्रशेखर शिंदे यांचे साथीदार बबलू ऊर्फ अभिजीत पाटील, राम गोतिसे आणि संदीप सानप यांनी फिर्यादीस नाशिकरोड न्यायालयातून जबरदस्तीने मुक्तिधाम येथील कार्यालयात नेले. तेथे सर्व आरोपींनी मिळून फिर्यादीस डांबून ठेवत शिवीगाळ व मारहाण केली. तसेच पैसे नसतानाही मित्राकडून ऑनलाइन रक्कम उचलण्यास भाग पाडले. यानंतर राम गोतिसे याने फिर्यादीस दुचाकीवरून दत्तमंदिर सिग्नल येथील अ‍ॅक्सिस बँकेच्या एटीएमवर नेऊन जीवे मारण्याची धमकी देत 50 हजार रुपये काढण्यास भाग पाडले. ही रक्कम चंद्रशेखर शिंदे याने कार्यालयात रोख स्वरूपात स्वीकारून उर्वरित दोन लाख रुपये 15 दिवसांत देण्याची मागणी केल्याचे तक्रारीत नमूद आहे. यावेळी सर्व आरोपींनी फिर्यादीस लाथाबुक्क्यांनी मारहाण करत अश्लील शिवीगाळ केले. आमच्या विरोधात न्यायालयात पुन्हा हजर राहिल्यास कळवणला जिवंत जाऊ देणार नाही, अशी धमकी देण्यात आल्याचेही फिर्यादीने म्हटले आहे. या धमक्यांमुळे फिर्यादी व त्यांचे कुटुंब दहशतीखाली जीवन जगत असल्याचे तक्रारीत नमूद करण्यात आले आहे. याप्रकरणी उपनगर पोलीस ठाण्यात चंद्रशेखर ऊर्फ पिंटू शिंदे, बबलू ऊर्फ अभिजीत पाटील, राम गोतिसे, संदीप सानप व अनिल दुसाने यांच्याविरोधात गुन्हा दाखल करण्यात आला आहे. पुढील तपास उपनगर पोलीस ठाण्याचे वरिष्ठ पोलीस निरीक्षक जयंत शिरसाठ यांच्या मार्गदर्शनाखाली पोलीस उपनिरीक्षक सपकाळे व पोलीस उपनिरीक्षक पवार तपास करीत आहेत.

The moneylender held it for interest.

Sheetal Nagpure

शीतल नागपुरे या गांवकरी मध्ये डिजिटल विभागात कार्यरत असून, १ वर्षापासून ऑनलाइन वृत्त संकलनाचे काम करत आहेत. त्या पदवीधर असून, त्यांना वाचनाची आवड आहे.