शिक्षकांच्या प्रसंगावधानाने विद्यार्थ्यांचे प्राण वाचले

ब्राह्मणगावला शाळा इमारतीवर कोसळले झाड

लासलगाव : वार्ताहर
ब्राह्मणगाव (विंचूर) येथील जिल्हा परिषद प्राथमिक शाळेत शुक्रवारी (दि. 3 जुलै) दुपारी एकच्या सुमारास मुसळधार पाऊस आणि वादळी वार्‍यामुळे मोठी दुर्घटना थोडक्यात टळली. शाळेच्या पाठीमागील कडुनिंबाचे जुने व मोठे झाड थेट इमारतीवर कोसळले. सुदैवाने या घटनेत जीवितहानी झाली नसली, तरी शाळेच्या छताचे मोठे नुकसान झाले आहे.
या जिल्हा परिषद शाळेत पहिली ते चौथीचे वर्ग भरत असून, एकूण 31 विद्यार्थी शिक्षण घेत आहेत. शुक्रवारी दुपारी नेहमीप्रमाणे शिक्षक विद्यार्थ्यांना वर्गात शिकवत असतानाच परिसरात वादळी वार्‍यासह मुसळधार पाऊस सुरू झाला. याच दरम्यान पाठीमागील कडुनिंबाचे मोठे झाड अचानक वर्गाच्या छतावर कोसळले. झाड पडल्याने अतिशय भयानक आणि मोठा आवाज झाला.
या अचानक झालेल्या आवाजामुळे चिमुकले विद्यार्थी आणि शिक्षक प्रचंड घाबरले. मात्र, शिक्षकांनी तत्काळ प्रसंगावधान राखत सर्व 31 विद्यार्थ्यांना सुरक्षितपणे वर्गाबाहेर काढले. शाळेच्या छताचे पत्रे नवीन असल्यामुळे झाड थेट वर्गात घुसले नाही, ज्यामुळे मोठा अनर्थ टळला.
झाड कोसळल्याचा आवाज एवढा मोठा होता की, परिसरातील नागरिकांनी घाबरून थेट शाळेकडे धाव घेतली. सर्व विद्यार्थी आणि शिक्षक सुरक्षित असले, तरी झाड पडल्यामुळे शाळेच्या नवीन पत्र्यांचे मोठे नुकसान झाले आहे. या घटनेनंतर परिसरात काही काळ भीतीचे वातावरण निर्माण झाले होते.

The students’ lives were saved thanks to the teachers’ presence of mind.