लासलगावच्या पोलिसाला पाच हजारांची लाच घेताना अटक
नाशिक: प्रतिनिधी
लासलगाव येथील पोलीस ठाण्यात नेमणुकीस असलेल्या कैलास सदाशिव बिडगर यास पाच हजारांची लाच घेताना लाच लुचपत प्रतिबंधक विभागाने रंगेहाथ पकडले. डोंगरगाव येथील तक्रारदार यांचा शेती व्यवसाय असून त्यांच्यावर लासलगाव येथील पोलीस ठाण्यात कलम 324, 504,506 अनवय्ये गुन्हा दाखल झालेला आहे. या गुन्ह्यात अटक टाळण्यासाठी तसेच कोर्टात मदत करण्याच्या मोबदल्यात 10 हजारांची लाच हवालदार बिडगर याने मागितली होती. तडजोडीअंती पाच हजारावर सौदा ठरला.
त्यामुळे तक्रारदार यांनी लाचलुचपत प्रतिबंधक विभागाकडे तक्रार केली होती. त्यानुसार सापळा रचण्यात आला असता पोलीस उपअधीक्षक अनिल बडगुजर, हवालदार संदीप वणवे, पोलीस शिपाई संजय ठाकरे, परशुराम जाधव यांच्या पथकाने रंगेहाथ पकडले, अधीक्षक शर्मिष्ठा घारगे, वालावलकर, अपर अधीक्षक माधव रेड्डी, उपअधीक्षक नरेंद्र पवार यांच्या मार्गदर्शनाखाली ही कारवाई करण्यात आली.