उमराळे येथे रॉयल बिअर शॉपीत चोरी

60 हजार रुपयांसह बिअर बाटल्या चोरल्या
उमराळे बुद्रुक : दिंडोरी तालुक्यातील उमराळे बुद्रुक येथील रॉयल बिअर अँड वाइन शॉपीमध्ये अज्ञात चोरट्यांकडून शॉपीचे जाळीचे कुलूप तोडून आतील गल्ल्यात ठेवलेले 60 हजार रुपये तसेच वाइनच्या बाटल्या चोरून नेल्या असून, उमराळे परिसरात एकच खळबळ उडाली आहे. मिळालेली माहिती अशी की, रविवार दिनांक 1 जून रोजी रात्री एक वाजेच्या सुमारास अज्ञात चोरट्यांनी उमराळे येथील रॉयल बिअर शॉपीचे शटर तोडून आत प्रवेश करीत, गल्ल्यातील 60 हजार रुपये तसेच बिअरच्या बाटल्या चोरून नेल्याचे मालक प्रवीण केदार यांनी सांगितले. वाइन शॉपी चालविणारे दिनेश वाघमारे यांनी वाइन शॉपीमध्ये चोरी झाल्याचे केदार यांना कळविले असता शॉपीमध्ये बिअरच्या बॉटलचे खोके अस्ताव्यस्त पडलेले आढळून आले. त्यावेळी त्यांनी तत्काळ दिंडोरी पोलीस स्टेशनला याबाबतची माहिती कळविली असता, दिंडोरी पोलीस स्टेशनचे पोलीस निरीक्षक रघुनाथ शेगर यांनी याबाबतची माहिती पी.आय. किसन काळे यांना कळवून सदरील घटनेची तपासणी करण्याचे आदेश दिले. त्यानुसार दिंडोरी पोलीस स्टेशनचे आवारी, जाधव कॉन्स्टेबल भोईर या घटनेचा अधिक तपास करीत आहेत.