ट्रम्प यांची इराणला पुन्हा मुदतवाढ; वाटाघाटीचे दावे इराणने फेटाळले

तेहरान/वॉशिंग्टन/तेल अवीव :
पश्चिम आशिया युद्धाचा 27 वा दिवस आणि युद्धनीतीचा गुंता आणखी घट्ट झाला आहे. अमेरिकेचे अध्यक्ष डोनाल्ड ट्रम्प यांनी इराणच्या ऊर्जा प्रकल्पांवरील हल्ले पुन्हा एकदा स्थगित ठेवण्याची घोषणा केली आहे. ट्रम्प यांनी जाहीर केले की, इराण सरकारच्या विनंतीनुसार ऊर्जा प्रकल्पांवरील हल्लेे 6 एप्रिल रात्री 8 वाजेपर्यंत स्थगित राहतील आणि चर्चा सुरळीत सुरू असल्याचे त्यांनी ठासून सांगितले. मात्र, इराणने लगेचच हे दावे फेटाळले.
अमेरिकेशी कोणत्याही थेट वाटाघाटी सुरू नाहीत आणि ट्रम्प यांचा दावा निराधार असल्याचे इराणच्या सरकारी माध्यमांनी म्हटले आहे. ट्रम्प ’डील’ म्हणत आहेत. इराण ’नाही’ म्हणत आहे आणि जग श्वास रोखून बघत आहे! 6 एप्रिलची मुदत हीच आता जगाची पुढली वाट ही शांततेची की महायुद्धाची हे ठरवणार आहे.
रणांगणावर मात्र एकही क्षण विराम नाही. इराणच्या आयआरजीसीने ’ऑपरेशन ट्रू प्रॉमिस 4’ची 83 वी लाट यशस्वीरीत्या राबवल्याची घोषणा केली. क्षेपणास्त्रे आणि ड्रोनच्या या संयुक्त हल्ल्यात इस्रायलमधील अशदोद तेलसाठे आणि मोदिइनमधील लष्करी ठाणी लक्ष्य करण्यात आली. प्रत्युत्तरादाखल इस्रायलने इराणच्या इस्फाहान येथे मोठ्या प्रमाणावर हल्ले केले आणि आयआरजीसी नौदलप्रमुखाला ठार केल्याचा दावा केला. इस्रायली सैन्याने दक्षिण लेबनॉनमध्ये प्रत्यक्ष भूमी कारवाई सुरू ठेवली आहे. बेरुतच्या दक्षिण उपनगरात एका निवासी इमारतीवर हल्ल्यात मोठा विध्वंस झाल्याचे वृत्त आहे.

हॉर्मुझ सुरक्षेसाठी बहुराष्ट्रीय नौदल पथक

रशियाच्या विनंतीवरून संयुक्त राष्ट्र सुरक्षा परिषदेची इराणविषयक बंद दरवाजाआड बैठक शुक्रवारी (दि. 27) सकाळी पार पडली. दरम्यान, यूएईने अमेरिका आणि पाश्चात्य मित्र राष्ट्रांना हॉर्मुझ सुरक्षित ठेवण्यासाठी बहुराष्ट्रीय नौदल पथकात सहभागी होण्याची तयारी दर्शवली आहे. डझनभर देशांना या ’हॉर्मुझ सुरक्षा दला’त सामील करण्याचे प्रयत्न सुरू आहेत.

Trump extends Iran deadline again; Iran rejects claims of negotiations