वृद्धेच्या गळ्याला चाकू लावत उकळले वीस लाख, पवन पवार विरुद्ध खंडणीचा गुन्हा दाखल

सिडको : विशेष प्रतिनिधी
वृद्धेच्या घरी जाऊन चाकूचा धाक दाखवून जिवे मारण्याची धमकी देत तिच्याकडून तब्बल २० लाख रुपयांची खंडणी उकळणाऱ्या पवन पवारसह तिघांविरुद्ध अंबड पोलीस ठाण्यात गुन्हा दाखल करण्यात आला आहे. या घटनेने परिसरात खळबळ उडाली आहे.

पोलिसांकडून मिळालेल्या माहितीनुसार, फिर्यादी महिला या नवीन सिडकोतील भुजबळ फार्म परिसरात राहत असून, एप्रिल २०२३ ते १ मार्च २०२४ या कालावधीत पवन पवार, त्याचा भाऊ विशाल पवार (दोघेही रा. जेलरोड, नाशिकरोड) आणि कल्पेश किरवे (रा. विठ्ठल मंदिराजवळ, जेलरोड) या तिघांनी मिळून त्यांच्या घरी येऊन चाकूचा धाक दाखवला. तसेच त्यांना जिवे मारण्याची धमकी दिली.

त्यानंतर या तिघांनी फिर्यादी महिलेला काळ्या काचा असलेल्या काळ्या रंगाच्या गाडीत जबरदस्तीने बसवले. त्यांच्या व त्यांच्या पतीच्या नावावरील मालमत्तांसंदर्भातील अधिकार विशाल पवारच्या नावावर व्हावेत, यासाठी तयार करण्यात आलेल्या नोटरी आणि रजिस्टर जनरल मुखत्यारपत्रावर सह्या घेण्यात आल्या. यानंतर सेंट्रल बँक अंबड शाखेतील खात्यात २० लाख रुपये भरून ते पैसे काढण्यासाठी पुन्हा एकदा फिर्यादीला गाडीत बसवून बँकेत नेण्यात आले आणि ते पैसे आरोपींनी ताब्यात घेतले.

पवन पवार हा गुंड प्रवृत्तीचा असून परिसरात त्याची दहशत असल्यामुळे फिर्यादी महिला भीतीपोटी यापूर्वी तक्रार देऊ शकल्या नव्हत्या. त्यांना कोणी आधार नसल्यामुळे ते गप्प राहिले होते. मात्र अलीकडे परिसरातील नागरिकांनी त्यांना धीर दिल्याने त्यांनी अखेर पोलीस ठाण्यात धाव घेतली आणि तक्रार दाखल केली.

या प्रकरणाचा पुढील तपास अंबड पोलीस ठाण्याचे वरिष्ठ पोलिस निरीक्षक जग्वेंद्रसिंग राजपुत यांच्या मार्गदर्शनाखाली पोलीस निरीक्षक सचिन खैरनार करीत आहेत