हॉटेल पेटवण्याचा प्रयत्न करणार्‍या दोघांना अटक

अन्य दोघांचा शोध सुरू

सिडको : विशेष प्रतिनिधी
सातपूर औद्योगिक वसाहतीतील हॉटेल कुमारा बिअर बारला जाळण्याचा प्रयत्न करणार्‍या चौघा संशयितांपैकी दोघांना अटक करण्यात आली असून, उर्वरित दोघांचा पोलिसांकडून शोध सुरू आहे.
पोलिसांकडून मिळालेल्या माहितीनुसार, चार संशयित आरोपी दुचाकीवरून हॉटेल कुमारा येथे आले. त्यावेळी हॉटेल बंद होते आणि गेट लावलेले होते. तरीही त्यांनी आपल्यासोबत आणलेल्या ज्वलनशील पदार्थांच्या बाटल्या हॉटेलच्या दिशेने फेकून आग लावण्याचा प्रयत्न केला. या आगीत हॉटेलचे फ्लेक्स बोर्ड, बाह्य लायटिंग व दोन सोफे अर्धवट जळाले असून, हॉटेलचे मोठे नुकसान झाले आहे. या प्रकरणात गुन्हे शोध पथकाने तत्परतेने तपास सुरू केला होता.
याचवेळी आरोपी जेहान सर्कल परिसरात येणार असल्याची गुप्त माहिती सागर गुंजाळ यांना मिळाल्यानंतर पोलिसांनी सापळा रचून बबलू रमेश पटेल (24, रा. शिवाजीनगर) व वैभव शिवाजी साळुंके (28, रा. सातपूर) यांना अटक केली. उर्वरित दोघे फरार असून, त्यांचा शोध सुरू आहे.
ही कारवाई वरिष्ठ पोलीस निरीक्षक रणजीत नलावडे यांच्या मार्गदर्शनाखाली गुन्हे शाखेचे निरीक्षक विश्वास पाटील, पो. उपनिरीक्षक राहुल नळकांडे, सागर गुंजाळ, दीपक खरपडे, भूषण शेजवळ, योगेश गायकवाड व सचिन अजबे यांच्या पथकाने केली.