सिडको : प्रतिनिधी
स्मार्ट सिटीअंतर्गत सीसीटीव्ही केबल टाकण्याच्या कामादरम्यान पुन्हा एकदा पिण्याच्या पाण्याच्या जलवाहिनीला धक्का लागून ती फुटल्याची घटना घडली.
ओम कॉलनीतील झुडिओ मॉलजवळ जेसीबीद्वारे खोदकाम सुरू असताना जलवाहिनी फुटली. यामुळे मोठ्या दाबाने पाणी बाहेर पडून काही वेळातच परिसर जलमय झाला. या घटनेत मोठ्या प्रमाणात पिण्याचे पाणी वाया गेल्याने नागरिकांनी तीव्र संताप व्यक्त
केला आहे.
याच ठिकाणी काही दिवसांपूर्वीही जलवाहिनी फुटण्याची घटना घडली होती. त्यानंतरही संबंधित यंत्रणेकडून आवश्यक खबरदारी न घेतल्याने पुन्हा अशीच घटना घडल्याने नागरिकांनी नाराजी व्यक्त केली आहे. भूमिगत जलवाहिन्यांची अचूक माहिती घेऊनच खोदकाम केले जाते का, असा प्रश्नही उपस्थित केला
जात आहे.
महापालिकेकडून नागरिकांना पाणी बचतीचे आवाहन केले जात असताना विकासकामांच्या निष्काळजीपणामुळे लाखो लिटर पिण्याचे पाणी रस्त्यावर वाहून जात असल्याचे चित्र समोर आले आहे. त्यामुळे या प्रकारामुळे संबंधित यंत्रणांच्या कार्यपद्धतीवर प्रश्नचिन्ह निर्माण झाले आहे.
घटनेनंतर जलवाहिनीची तातडीने दुरुस्ती करण्याचे काम हाती घेण्यात आले. मात्र, भविष्यात अशा घटना टाळण्यासाठी भूमिगत जलवाहिन्यांचे अचूक नकाशे वापरूनच खोदकाम करण्यात यावे, तसेच संबंधित ठेकेदार व अधिकार्यांची जबाबदारी निश्चित करून कठोर कारवाई करावी, अशी मागणी नागरिकांकडून होत आहे.
ठेकेदाराकडून नुकसानभरपाईची मागणी
संबंधित ठेकेदाराच्या निष्काळजीपणामुळे जलवाहिनी फुटली असल्यास त्याच्यावर तातडीने दंडात्मक कारवाई करून पिण्याच्या पाण्याच्या नुकसानीची भरपाई वसूल करावी, अशी मागणी नागरिकांनी केली आहे. तसेच वारंवार घडणार्या जलवाहिनी फुटीच्या घटनांची सखोल चौकशी करून संबंधित अधिकारी आणि ठेकेदाराची जबाबदारी निश्चित करावी, अशीही मागणी जोर धरत आहे.
Water pipeline burst during excavation for cables.