पैसे न दिल्याच्या रागातून तरुणावर धारदार शस्त्राने हल्ला

सिडको : प्रतिनिधी
पैसे न दिल्याच्या रागातून तरुणावर धारदार शस्त्राने हल्ला करून मारहाण केल्याची घटना वडाळागाव परिसरात घडली. याप्रकरणी इंदिरानगर पोलिस ठाण्यात चौघांविरोधात गुन्हा दाखल करण्यात आला आहे. अफजल खान असलम खान (वय 22, रा. रेहमतनगर, गल्ली क्रमांक 2, वडाळागाव) यांनी याबाबत फिर्याद दिली आहे. ते साडी विक्रीचा व्यवसाय करतात.
पोलिसांनी दिलेल्या माहितीनुसार, रेहमतनगर गल्ली क्र. 2 येथे आरोपी अजीम शेख, नदिम शेख, यार खान व त्यांचा एक साथीदार यांनी संगनमत करून फिर्यादीकडे महिनाभरापूर्वी पैसे मागितले होते. पैसे न दिल्याचा राग मनात धरून आरोपी अजीम शेख याने हातातील धारदार वस्तूने फिर्यादीच्या उजव्या हातावर वार करून जखमी केले. या हल्ल्यानंतर फिर्यादी खाली पडल्यावर अन्य आरोपींनी लाथाबुक्क्यांनी मारहाण केली. झटापटीदरम्यान फिर्यादीच्या खिशातील आठ हजार 700 रुपये खाली पडून नुकसान झाल्याचे फिर्यादीत म्हटले आहे. तसेच आरोपींनी शिवीगाळ करत ’तुला बघून घेतो, येथे राहू देणार नाही,’ अशी धमकी दिल्याचाही आरोप करण्यात आला आहे. जखमी अवस्थेत फिर्यादीने सिव्हिल हॉस्पिटल येथे जबाब दिल्यानंतर इंदिरानगर पोलिस ठाण्यात गुन्हा दाखल करण्यात आला आहे. पुढील तपास पोलिस हवालदार शेख करीत आहेत.

Young man attacked with sharp weapon in anger over non-payment