राज्यात सूर्याचा प्रकोप, नऊ शहरे 45 अंशांच्या पार

नागपूर : प्रतिनिधी
भारतीय हवामान विभाग (आयएमडी)ने सोमवारी, संध्याकाळी 5:30 वाजता घेतलेल्या नोंदींनुसार, संपूर्ण महाराष्ट्र आणि विशेषतः विदर्भ प्रांत प्रचंड उष्णतेच्या लाटेच्या विळख्यात सापडला आहे. विदर्भातील चंद्रपूर जिल्ह्यातील ब्रह्मपुरी शहर महाराष्ट्रातीलच नव्हे, तर उत्तर प्रदेशातील बांदा शहरासह संपूर्ण देशातील सर्वांत उष्ण शहर ठरले आहे. ब्रह्मपुरीत तब्बल 47.6 अंश सेल्सिअस एवढ्या विक्रमी कमाल तापमानाची नोंद झाली आहे. हे तापमान सरासरीपेक्षा 5.0 अंश सेल्सिअसने जास्त आहे.
या तीव्र उन्हामुळे संपूर्ण विदर्भातील जनजीवन विस्कळीत झाले असून, नागरिकांना दुपारच्या वेळी घराबाहेर पडणे अशक्य झाले आहे.
हवामान खात्याने जारी केलेल्या आकडेवारीनुसार, महाराष्ट्रातील एकूण नऊ प्रमुख शहरांमध्ये तापमान 45.0 अंश सेल्सिअस किंवा त्याहून अधिक नोंदवले गेले आहे. यामध्ये ब्रह्मपुरीखालोखाल उपराजधानी नागपूरमध्ये 46.5 अंश सेल्सिअस (+3.3) तापमानाची नोंद झाली. त्यापाठोपाठ गडचिरोली आणि भंडारा येथे प्रत्येकी 46.4 अंश, तर गोंदियामध्ये 46.1 अंश सेल्सिअस (+3.3) इतका तीव्र उन्हाचा चटका जाणवला. उद्योगनगरी चंद्रपूर आणि वर्धा येथेही पारा 46.0 अंश सेल्सिअसवर (+3.1) पोहोचल्याने नागरिक उन्हाच्या झळांनी होरपळून निघाले आहेत. याशिवाय, पश्चिम विदर्भातील अकोला येथे 45.4 अंश (+3.3) आणि अमरावतीमध्ये 45.0 अंश सेल्सिअस (+3.7) तापमानाची नोंद झाली आहे.
विदर्भातील या वाढत्या पार्‍यामुळे हवामान विभागाने नागरिकांना आरोग्याची विशेष काळजी घेण्याचे आवाहन केले आहे. दुपारच्या 11 ते दुपारी 4 या वेळेत थेट उन्हात जाणे टाळणे, पुरेशा प्रमाणात पाणी पिणे आणि उष्माघातापासून स्वतःचा बचाव करणे आवश्यक असल्याचे प्रशासनाने स्पष्ट केले आहे. यंदा सरासरीपेक्षा 3 ते 5 अंशांनी तापमान वाढल्यामुळे विदर्भातील पाणीटंचाई आणि वीजेची मागणी वाढण्याची शक्यता वर्तवली जात आहे. पुढील काही दिवस ही उष्णतेची लाट अशीच तीव्र राहण्याचा अंदाज असल्याने विदर्भातील सर्वच जिल्ह्यांना सतर्कतेचा इशारा (अलर्ट) देण्यात आला आहे.

14 people died in two accidents