अठरा हजार खड्डे बुजविले; मनपाच्या बांधकाम विभागाचा दावा

नाशिक : प्रतिनिधी
गणेशोत्सवापूर्वी शहरातील रस्त्यांवरून गणपती बाप्पांचे आगमन खड्डेमुक्त रस्त्यांवरून व्हावे, याकरिता महापालिका प्रशासन कामाला लागले आहे. दरम्यान, महापालिकेच्या बांधकाम विभागाने शनिवार(दि.5)पर्यंत शहरातील 22 हजारांपैकी 18 हजार 423 खड्डे बुजविल्याचा दावा केला आहे.
रस्त्यांवरील खड्ड्यांमुळे नागरिकांना प्रचंड त्रास होत असून, दररोज कुठेना कुठे अपघात होत आहेत. महापालिकेने रस्ते दुरुस्तीची मोहीम हाती घेतली असून, आतापर्यंत 18 हजार खड्डे बुजविल्याचा दावा केला जात आहे. मात्र, शहरात अद्याप खड्ड्यांचे साम्राज्य असून, प्रशासनाने खोटे आकडे देऊन धूळफेक करू नये, असा आरोप नागरिक करत आहेत.
शहरात जूनपासून खड्डे बुजविले जात आहेत. मुख्य रस्ते, वाहतुकीची जास्त वर्दळ असलेले मार्ग आणि नागरिकांकडून प्राप्त होणार्‍या तक्रारींना प्राधान्य देत विभागनिहाय पथके सातत्याने कार्यरत आहेत. नागरिकांच्या तक्रारींवर तातडीने कार्यवाही करत वाहतुकीला अडथळा निर्माण करणार्‍या ठिकाणांना प्राधान्य दिले जात आहे. पावसाळ्याच्या सुरुवातीपासून खड्ड्यांमुळे अपघात, वाहतूक कोंडी आणि वाहनांचे नुकसान वाढले आहे. त्यामुळे महापालिकेने केलेल्या दाव्यात कितपत तथ्य आहे, याची स्वतंत्र पडताळणी करण्याची मागणी होत आहे. कागदोपत्री खड्डेमुक्ती आणि प्रत्यक्षातील विदारक रस्ते यात तफावत असल्याचा आरोप नागरिकांनी केल्याने खड्डे दुरुस्तीवर प्रश्नचिन्ह उपस्थित केले जात आहे.

विभाग दुरुस्ती केलेले खड्डेे दुरुस्ती करावयाचे खड्डे
नाशिक पूर्व 1936 324
पश्चिम 1253 226
पंचवटी 5145 1385
नाशिकरोड 2508 304
सातपूर 2226 580
नवीन नाशिक 5003 821
एकूण 18,423 3,640

18,000 potholes filled; Municipal Corporation’s Construction Department claims.

Sheetal Nagpure

शीतल नागपुरे या गांवकरी मध्ये डिजिटल विभागात कार्यरत असून, १ वर्षापासून ऑनलाइन वृत्त संकलनाचे काम करत आहेत. त्या पदवीधर असून, त्यांना वाचनाची आवड आहे.