स्क्रीनवर झळकते एकच कथा, खरातबाबा चर्चेच्या नवनव्या व्यथा

सोशल मीडियावर खरातबाबा ट्रेंडिंगला

नाशिक ः प्रतिनिधी
गेल्या चार दिवसांपासून नाशिकसह राज्यात भोंदूबाबा कॅप्टन अशोक खरात याची चर्चा सुरू आहे. सोशल मीडियावर खरातबाबा टे्रेंडिंगला असून, टीव्ही, मोबाईल, सोशल मीडियासाठी स्क्रीन उघडला की खरातचे नवनवे कारनामे आणि पीडितांंच्या नवनव्या व्यथा ऐकायला/पाहायला मिळत आहेत. त्यामुळे खरातच्या भोंदूगिरीत कोणकोण अडकले, किती कोटींची मालमत्ता, किती पीडिता, अजून नवे काय कारनामे ऐकायला येऊ शकतात, याची उत्सुकता नेटकर्‍यांमध्ये आहे. सध्या सोशल मीडिया खरातबाबाने कॅच केलेला दिसून येत आहे.
कॅप्टन अशोक खरात याला दि. 18 मार्चला अटक करण्यात आली होती. अतिशय नाट्यमय पद्धतीने खरातला अटक करण्यात आली होती. महिलांचे लैैंगिक शोषण, गुंगीचे औषध देत महिलांना संमोहित करून अत्याचार तसेच गर्भवतीवरही अत्याचार आदी गंभीर आरोप त्याच्यावर आहेत. त्याची एसआयटीमार्फत चौकशी सुरू आहे. खरातचे पाय खोलात असून, त्याच्यावर तीन गुन्ह्यांंची नोंद झाली आहे. या भोंदू कॅप्टनबाबत दररोज नवनवे खुलासे होत आहेत. त्यानिमित्ताने ईशान्येश्वर मंदिर चर्चेत आले. देवस्थानासाठी पाण्याचे आरक्षण, त्याची संपत्ती, बंगला, बाबाची जीवनशैली, परदेशातील त्याचे लक्झरी जीवनमान, त्याचे हायप्रोफाइल लोकांशी संबंध आदी सर्वच बाबाच्या चर्चा सोशल मीडियावर व्हायरल होत आहेत. नेटकरी व्हायरल व्हिडिओवर व्यक्त होताना दिसत आहेत. या प्रकरणात एआयचा वापर करूनही अनेकांनी फोटो व्हायरल केले आहेत. त्यावर नेटकर्‍यांच्या कधी संतापजनक, तर कधी फनी कमेंट केल्या जात आहेत. या प्रकरणाचे गांभीर्य ओळखून या सर्व प्रकारात कायदेशीर कारवाईचा इशारा देण्यात आला आहे.

A single story appears on the screen, new sorrows of the Kharat Baba discussion