अफवेवर विश्वास न ठेवण्याचे इंदिरानगर पोलिसांचे आवाहन

अफवेवर विश्वास न ठेवण्याचे इंदिरानगर पोलिसांचे आवाहन
इंदिरानगर| वार्ताहर | शहरात मुले चोरी कार्यरत आहे अशी अफवा पसरवली जात आहे. यात कोणतीही सत्यता नसून ही केवळ अफवा आहे. या अफवांवर विश्वास ठेवू नका असे आवाहन इंदिरानगर पोलिसांच्या वतीने करण्यात येत आहे.
शहरात लहान मुलांना पळवणारी टोळी कार्यरत आहे असे सध्या सोशल मीडिया वरून पसरवले जात आहे. या अफवा पसरविण्यासाठी सोशल मीडियाचा वापर होत असल्याने या अफवा वाऱ्यासारख्या पसरत आहेत. यामुळे निरपराध व्यक्तींना मारहाण होण्याचे प्रकार घडत आहेत. मुले चोरण्यासाठी आल्याचा संशय आल्याने सिडकोत एका महिलेला मारहाण झाली. वडाळा गावात मित्राची चेष्टा करण्यासाठी आईचा बुरखा घालून एक मुलगा वडाळा गावातील जॉगिंग ट्रॅक येथे आला होता. तेथे मित्राची चेष्टा करत असताना आजूबाजूला असलेल्या लोकांनी त्याच्या पायातील स्पोर्ट शूज ओळखले. बुरखा घातलेली महिला नसून पुरुष आहे हे समजताच लोकांनी त्याच्या चेहऱ्यावरील नकाब बाजूला केला. लहान मुले चोरणारा आहे असा गैरसमज करून त्यांनी त्यास मारहाण केली. सुदैवाने वेळीच पोलीस घटनास्थळी पोहचल्याने पुढील अनर्थ टळला.
शहरातील अशा वारंवार होणाऱ्या घटना लक्षात घेऊन या खोट्या अफवांवर विश्वास ठेवू नये असे आवाहन इंदिरानगर पोलिसांनी
नागरिकांना केले आहे. अफवा पसरवणाऱ्या व्यक्तींविरुद्ध तसेच कायदा हातात घेऊन मारहाण करणाऱ्या विरुद्ध कायदेशीर कडक कारवाई करण्यात येणार आहे. नागरिकांना काही संशयास्पद व्यक्तीविरुद्ध शंका आल्यास त्यास कोणत्याही प्रकारची मारहाण अगर इजा न करता त्याची माहिती तात्काळ डायल ११२ वर किंवा इंदिरानगर पोलीस ठाणे क्रमांक ०२५३२३२८८३३ किंवा मुख्य नियंत्रण कक्ष ०२५३२३०५२३३ यांच्याशी संपर्क साधण्याचे आवाहन वरिष्ठ पोलीस निरीक्षक संजय बांबळे यांनी केले आहे.