लैंगिक शोषण प्रकरणातील संशयित एरंडेची कोठडी संपणार

पुन्हा कोठडीची मागणी होण्याची शक्यता

सिडको : प्रतिनिधी
सातपूर परिसरात लैंगिक शोषण व फसवणुकीच्या गंभीर प्रकरणात अटक करण्यात आलेल्या संशयिताची दोन दिवसांची पोलीस कोठडी संपत असून, आज त्याला न्यायालयात हजर करण्यात येणार आहे. तपासात सहकार्य न
केल्याने पोलिसांकडून पुन्हा कोठडीची मागणी होण्याची
शक्यता आहे.
सातपूर पोलीस ठाण्यात दाखल असलेल्या लैंगिक शोषण व फसवणूक प्रकरणातील संशयित आरोपी रवींद्र नारायण एरंडे (वय 63, रा. नीलकंठेश्वरनगर, अशोकनगर, सातपूर) याची दोन दिवसांची पोलीस कोठडी आज संपत आहे. त्यामुळे त्याला आज जिल्हा न्यायालयात हजर करण्यात येणार असून, पोलीस पुन्हा कोठडीची मागणी करणार असल्याची माहिती समोर येत आहे. पोलिसांनी दिलेल्या माहितीनुसार, संशयिताने गरजू महिलांना नोकरीचे आमिष दाखवून त्यांचे लैंगिक शोषण केल्याची तक्रार दाखल झाली होती. तसेच संबंधित महिलांचे व्हिडिओ चित्रीकरण करून त्यांना ब्लॅकमेल करत त्यांची फसवणूक केल्याचाही आरोप आहे.
या प्रकरणात तपासादरम्यान संशयिताकडून सुमारे 100 हून अधिक महिलांशी संबंधित व्हिडिओ असलेला पेन ड्राइव्ह, डीव्हीआर जप्त करण्यात
आल्याने मोठी खळबळ
उडाली होती.
या प्रकरणात आणखी पीडित महिलांनी पुढे येऊन तक्रार दाखल करावी, असे आवाहनही पोलिसांनी केले आहे. न्यायालयाने यापूर्वी संशयिताला दोन दिवसांची पोलीस कोठडी सुनावली होती. दरम्यान, तपासादरम्यान संशयिताकडून अपेक्षित सहकार्य मिळत नसल्याने पोलिसांकडून त्याची पोलीस कोठडी वाढविण्याची मागणी केली जाण्याची शक्यता व्यक्त केली
जात आहे.

Arande, a suspect in the sexual abuse case, will be released from custody.