इंधन दरवाढीने सिटीलिंकला आर्थिक झळ

प्रशासनाकडून तिकीट दरवाढ?

नाशिक : प्रतिनिधी
पश्चिम आशियात पेटलेल्या युद्धामुळे इंधन व सीएनजीच्या दरवाढीचा आर्थिक फटका शहराची जीवनवाहिनी समजल्या जाणार्‍या सिटीलिंक बससेवेला बसतो आहे. दरम्यान, या पार्श्वभूमीवर सिटीलिंक प्रशासन भाडे दरवाढ करण्याची शक्यता वर्तवली जात आहे. असे झाल्यास प्रवाशांना भाडे दरवाढीला सामोरे जावे लागणार आहे.
नाशिक महापालिकेकडे 250 बसेस असून, त्यांपैकी 200 बसेस सीएनजीवर व 50 बसेस डिझेलवर धावतात. या बससेवेवर हजारो नागरिक प्रवास करतात. शहरात एकूण एक हजार 206 फेर्‍या दररोज होतात. मात्र, वाढत्या इंधनदरामुळे बससेवेच्या दैनंदिन खर्चात वाढ होत आहे. विशेषतः सीएनजीच्या दरातील वाढ आणि पुरवठ्यावरील अनिश्चिततेमुळे प्रशासनाची चिंता वाढली आहे. आधीच सिटीलिंक तोट्यात असतानाच आता इंधन दरवाढीच्या खर्चामुळे येत्या काही दिवसांत सिटीलिंक बससेवेची तिकीट दरवाढ करण्याची शक्यता आहे.
सिटीलिंकने असा निर्णय घेतल्यास त्याचा हजारो विद्यार्थी, नोकरदार, कामगार आणि रोजच्या प्रवाशांना फटका बसेल. 8 जुलै 2021 रोजी शहरात सिटीलिंक सेवा सुरू करण्यात आली. नाशिककरांचा चांगला प्रतिसाद या बससेवेला मिळतो आहे. सहा वर्षांत सिटीलिंकमुळे महापालिकेला 333 कोटी 13 लाख रुपयांचा आर्थिक भार उचलावा लागला आहे. अखेरची दरवाढ 2023 मध्ये झाली होती. सीएनजी व डिझेलच्या दरात सातत्याने वाढ होत असल्याने मनपाच्या सिटीलिंकला आर्थिक झळ बसत आहे. त्यामुळेच सिटीलिंक प्रशासन तिकीट दरवाढीचा विचार करत असल्याचे समजते आहे.

शहरात पूर्णक्षमतेने सिटीलिंक बससेवा सुरू आहे. एकही
फेरी रद्द करण्यात आलेली नाही. मात्र, इंधनाचे वाढते दर, सीएनजी पुरवठ्यावरील परिणामामुळे वाढता खर्च लक्षात घेता, भविष्यात भाडे दरवाढीबाबत विचार केला जाऊ शकतो.
– विजयकुमार मुंडे, मुख्य कार्यकारी अधिकारीे, सिटीलिंक

 

Citylink suffers financial blow due to fuel price hike