राहुड घाटात ब्रेक निकामी झाल्याने कंटेनरचा चुराडा

केबिनमधील चालकाला शर्थीनंतर जीवदान

चांदवड : प्रतिनिधी
मुंबई-आग्रा राष्ट्रीय महामार्गावरील अत्यंत धोकादायक मानल्या जाणार्‍या राहुड घाटात अचानक ब्रेक फेल झाल्याने एका भरधाव कंटेनरचा भीषण अपघात झाला. या अपघातात कंटेनरच्या केबिनचा चक्काचूर होऊन चालक आतच गंभीर जखमी अवस्थेत अडकला होता. स्थानिक नागरिक व नाणीज संस्थानाच्या रुग्णवाहिका चालकाने दाखवलेल्या प्रसंगावधानामुळे पाऊण तासाच्या शर्थीच्या प्रयत्नांनंतर चालकाला सुखरूप बाहेर काढण्यात यश आले. ही घटना बुधवारी (दि. 2) दुपारी पावणेतीन वाजेच्या सुमारास घडली. रवींद्र कुमार उपाध्याय (रा. लखनौ, उत्तर प्रदेश) असे अपघातात गंभीर जखमी झालेल्या कंटेनर चालकाचे नाव आहे.
मिळालेल्या माहितीनुसार, सदर कंटेनर मुंबईहून मालेगावच्या दिशेने जात असताना राहुड घाटातील तीव्र उतारावर अचानक त्याचे ब्रेक निकामी झाले. चालकाचे नियंत्रण सुटल्याने हायवेवर भीषण अपघात घडला. अपघाताची तीव्रता इतकी प्रचंड होती की, कंटेनरच्या पुढील भागाचा अक्षरशः चुराडा झाला आणि चालक रवींद्र कुमार आत रक्ताच्या थारोळ्यात दाबले गेले. अपघाताची माहिती मिळताच जगद्गुरू रामानंदाचार्य नरेंद्राचार्यजी महाराज संस्थान (नाणीज) यांच्या मोफत रुग्णवाहिकेने तातडीने घटनास्थळी धाव घेतली. रुग्णवाहिका चालक आणि स्थानिक नागरिकांनी पत्रे कापून व बाजूला करून चालकाला सुरक्षित बाहेर काढले. जखमी चालकाला तातडीने चांदवड उपजिल्हा रुग्णालयात दाखल करण्यात आले आहे. वेळेत मदत मिळाल्याने चालकाचे प्राण वाचले असून, नागरिकांच्या आणि रुग्णवाहिका चालकाच्या या कामगिरीचे सर्वत्र कौतुक होत आहे.

Container mangled after brake failure in Rahud Ghat.

Sheetal Nagpure

शीतल नागपुरे या गांवकरी मध्ये डिजिटल विभागात कार्यरत असून, १ वर्षापासून ऑनलाइन वृत्त संकलनाचे काम करत आहेत. त्या पदवीधर असून, त्यांना वाचनाची आवड आहे.