सातपूर औद्योगिक परिसरात डिझेल चोरांचा धुमाकूळ

चार जड वाहनांमधून डिझेल चोरी

सातपूर : प्रतिनिधी
नाशिकच्या सातपूर औद्योगिक परिसरात डिझेल चोरीच्या घटनांमध्ये वाढ होत असल्याचे पुन्हा एकदा समोर आले आहे. मंगळवारी मध्यरात्री अज्ञात चोरट्यांनी सिटीलिंक लॉजिस्टिक्स कंपनीच्या चार जड मालवाहू वाहनांच्या डिझेल टाक्यांचे लॉक तोडून अंदाजे 300 ते 400 लिटर डिझेल चोरी केल्याची घटना घडली.
ही घटना सातपूर येथील उज्ज्वल एजन्सीजसमोर मंदिर परिसरात घडली. चोरी झालेल्या वाहनांचे क्रमांक एनएल 0101 एबी 7053, एनएल 01 एबी 7052, एनएल 01 एबी 8009 आणि एनएल 01 एडी 0709 असे असून, ही सर्व वाहने अशोक लेलँड कंपनीची 14 चाकी मालवाहू
वाहने आहेत.
घटनास्थळासमोरील एका कंपनीच्या सीसीटीव्ही कॅमेर्‍यात काही संशयित व्यक्ती एका कारमधून येताना आणि जाताना दिसून आल्या. प्राथमिक तपासात संबंधित कारचा क्रमांक एमएच 15 डीसी 7457 असल्याचे आढळले. मात्र, पुढील पोलीस तपासात आरोपींनी चोरीसाठी बनावट (डुप्लिकेट) नंबरप्लेटचा वापर केल्याचे समोर आले आहे. सिटीलिंक लॉजिस्टिक्सचे संचालक ओमप्रकाश यादव यांनी सांगितले की, या घटनेमुळे कंपनीचे मोठे आर्थिक नुकसान झाले असून, परिसरातील इतर वाहनमालकांमध्येही भीतीचे वातावरण निर्माण झाले आहे. आरोपींचा तातडीने शोध घेऊन त्यांच्यावर कठोर कारवाई करावी तसेच औद्योगिक परिसरात रात्रीची पोलीस गस्त वाढवावी, अशी मागणी त्यांनी केली आहे. स्थानिक उद्योजक आणि ट्रान्स्पोर्ट व्यावसायिकांनीही डिझेल चोरीच्या वाढत्या घटनांबाबत चिंता व्यक्त केली असून, अशा गुन्ह्यांना आळा घालण्यासाठी पोलिसांनी विशेष मोहीम राबवावी, अशी मागणी केली आहे. दरम्यान, सातपूर पोलीस सीसीटीव्ही फुटेज आणि इतर तांत्रिक पुराव्यांच्या आधारे आरोपींचा शोध घेत असून, पुढील तपास सुरू आहे.

Diesel thieves on the rampage in Satpur industrial area.