अंबडला रस्ता खचल्याने डंपर अडकला खड्ड्यात

आठवड्याभरात दुसरी घटना; तात्पुरत्या डागडुजीवर नाराजी

सिडको : प्रतिनिधी
पाथर्डी फाटा ते अंबड गाव या मार्गावर स्मार्ट सिटीच्या कामासाठी खोदलेल्या रस्त्याची तात्पुरती डागडुजी केल्यानंतर पुन्हा रस्ता खचल्याची घटना गुरुवारी (दि. 3) सकाळी साडेअकराच्या सुमारास घडली. अंबड गावाजवळील महाराजा हॉटेलसमोर मुरूम टाकलेल्या भागावरून मातीने भरलेला डंपर जात असताना अचानक रस्ता खचून त्यात डंपर अडकला. सुदैवाने या घटनेत कोणतीही जीवितहानी झाली नाही.
स्मार्ट सिटीच्या कामासाठी काही दिवसांपूर्वी या ठिकाणी रस्ता खोदण्यात आला होता. काम झाल्यानंतर खोदलेला भाग मुरूम टाकून तात्पुरता बुजविण्यात आला होता. मात्र, कायमस्वरूपी दुरुस्ती न केल्याने अवजड वाहनांचा भार रस्त्याला सहन झाला नाही. परिणामी, रस्त्याचा काही भाग पुन्हा खचला. माती घेऊन जाणारा डंपर या मार्गावरून जात असताना त्याचे चाक रस्त्याच्या खचलेल्या भागात अडकले. त्यामुळे काही काळ वाहतुकीवरही परिणाम झाला. या मार्गावर मोठ्या प्रमाणात अवजड वाहनांची ये-जा असल्याने रस्त्याची सुरक्षितता आणि मजबुतीचा प्रश्न निर्माण झाला आहे.
दरम्यान, याच मार्गावर अवघ्या आठवडाभरात वाहन रस्त्यात फसण्याची ही दुसरी घटना आहे. काही दिवसांपूर्वी अंबड वजनकाट्याजवळ ट्रक रस्त्यात फसला होता. त्यानंतर आता डंपर खड्ड्यात अडकल्याने स्मार्ट सिटीच्या कामानंतर रस्त्याची करण्यात येणारी तात्पुरती दुरुस्ती कितपत टिकाऊ आहे, असा प्रश्न नागरिकांकडून उपस्थित केला जात आहे.

Dumper gets stuck in a pothole after the road caves in at Ambad.

Sheetal Nagpure

शीतल नागपुरे या गांवकरी मध्ये डिजिटल विभागात कार्यरत असून, १ वर्षापासून ऑनलाइन वृत्त संकलनाचे काम करत आहेत. त्या पदवीधर असून, त्यांना वाचनाची आवड आहे.