इस्कॉन मंदिरात आजपासून कृष्ण जन्मोत्सव

14 तास अखंड कीर्तनाचे आयोजन

नाशिक : प्रतिनिधी
भगवान श्रीकृष्णांचा पावन जन्मोत्सव इस्कॉन नाशिकच्या जनार्दन वैद्यनगर, हरे कृष्ण मार्ग येथील श्री श्री राधा मदन गोपाल मंदिरात दि. 4 आणि 5 सप्टेंबर रोजी साजरा होणार असून, उत्सवाची तयारी अंतिम टप्प्यात आली आहे. जन्माष्टमीनिमित्त इस्कॉनचे वरिष्ठ प्रचारक व आंतरराष्ट्रीय ख्यातीचे कथाकार चैतन्य चरणदास यांची विशेष कृष्णकथेसाठी उपस्थिती लाभणार आहे. यावेळी दि. 6 सप्टेंबरपर्यंत पाच दिवसीय विशेष कृष्णकथेचे आयोजन करण्यात आले आहे. दि. 4, 5 व 6 रोजी सकाळच्या सत्रात कथा होणार आहे.
जन्माष्टमीच्या दिवशी 4 सप्टेंबरला पहाटे 5 वाजता मंगल आरतीने उत्सवाला प्रारंभ होईल. सकाळी 6 वाजता हरे कृष्ण महामंत्र जप व श्रीमद्भागवत प्रवचन होईल. दिवसभर श्री श्री राधा मदन गोपालजींचे दर्शन घेता येणार असून, मंदिरात सलग 14 तास अखंड कीर्तन होणार आहे. मंदिर परिसर, मुख्य वेदी आणि विग्रहांची सुवासिक फुलांनी सजावट व विद्युत रोषणाई करण्यात
येणार आहे.
रात्री 11 वाजता श्री राधा-कृष्णाच्या उत्सव विग्रहांचा पंचामृत व विविध फळांच्या रसांनी अभिषेक होईल. त्यानंतर नैवेद्य अर्पण करून मध्यरात्री 12 वाजता कृष्ण जन्ममुहूर्तावर मुख्य महाआरती होईल. 5 सप्टेंबरला सकाळी 11 ते दुपारी 1 या वेळेत पारंपरिक नंदोत्सव तसेच इस्कॉनचे संस्थापकाचार्य श्रील प्रभुपाद यांचा आविर्भाव महोत्सव साजरा होईल. इस्कॉन यूथ सर्व्हिसच्या माध्यमातून युवकांसाठी प्रेरणा, तर युवतींसाठी चेतना उपक्रमांसह धार्मिक ग्रंथ व आध्यात्मिक साहित्याचे स्टॉल उभारले जाणार आहेत. उत्सवकाळात भाविकांसाठी महाप्रसादाचे वितरण करण्यात येणार आहे.

Krishna Janmotsav begins today at the ISKCON temple.