25 फूट उंच उड्डाणपुलावरून आयशर कोसळला; चालकाचा जागीच मृत्यू

मुसळगाव बायपासवरील अपघात सीसीटीव्हीत कैद

सिन्नर : प्रतिनिधी
सिन्नर-शिर्डी महामार्गावरील मुसळगाव बायपास उड्डाणपुलावर रविवारी (दि. 26) दुपारी 4.15 वाजेच्या सुमारास झालेल्या भीषण अपघातात आयशर टेम्पो सुमारे 25 फूट उंचीवरून खाली कोसळल्याने चालकाचा जागीच मृत्यू झाला. वाहनावरील नियंत्रण सुटल्याने टेम्पो प्रथम पुलाच्या कठड्याला धडकला आणि त्यानंतर थेट खाली उलटला.
अपघाताची तीव्रता इतकी भीषण होती की, वाहनाची पुढील बाजू पूर्णपणे चिरडली गेली. सुदैवाने अपघाताच्या वेळी पुलाखाली कोणतेही वाहन नसल्याने मोठी जीवितहानी टळली. मृत चालकाचे नाव रावजीभाई मंजीभाई भंडेनिया (56, रा. राजकोट, गुजरात) असे आहे. ते जीजे-03 डीवाय-0328 क्रमांकाचा आयशर टेम्पो घेऊन नाशिकहून शिर्डीकडे जात होते. मुसळगाव बायपास उड्डाणपुलाजवळ वाहनावरील ताबा सुटल्याने हा अपघात घडला. अपघातात वाहनाचेही मोठे नुकसान झाले. या प्रकरणी राजेश वसंत तांबे (रा. पंचवटी, नाशिक) यांच्या फिर्यादीवरून एमआयडीसी सिन्नर पोलीस ठाण्यात अपघाताचा गुन्हा दाखल करण्यात आला आहे. पुढील तपास पोलीस निरीक्षक सुनील बडगुजर यांच्या मार्गदर्शनाखाली हवालदार नवनाथ चकोर
करीत आहेत.

अपघातापूर्वी श्वानांची धावपळ; व्हिडिओ व्हायरल

घटनास्थळाजवळील सीसीटीव्ही कॅमेर्‍यात अपघाताची संपूर्ण घटना कैद झाली आहे. व्हिडिओमध्ये अपघात होण्यापूर्वी पुलाखाली असलेली काही कुत्री अचानक भुंकत पुलाच्या दिशेने धावताना दिसतात. काही क्षणांतच आयशर टेम्पो कठड्याला धडकून उड्डाणपुलावरून खाली कोसळतो. अपघातानंतर तीच कुत्री घाबरून मागे फिरताना दिसतात. हा व्हिडिओ सोशल मीडियावर मोठ्या प्रमाणात व्हायरल झाला असून, श्वानांना अपघाताची पूर्वचाहूल लागल्याची चर्चा परिसरात रंगली आहे.

Eicher truck plunges from 25-foot-high flyover; driver dies on the spot.

Sheetal Nagpure

शीतल नागपुरे या गांवकरी मध्ये डिजिटल विभागात कार्यरत असून, १ वर्षापासून ऑनलाइन वृत्त संकलनाचे काम करत आहेत. त्या पदवीधर असून, त्यांना वाचनाची आवड आहे.