सदोष व्यावसायिक पाणीमीटर रडारवर

60 जणांना नोटिसा, मनपाकडून तपासणी

नाशिक : प्रतिनिधी
नाशिक महापालिकेच्या करसंकलन विभागाने गतवर्षी शहरातील रहिवााी पाणीमीटरची तपासणी मोहीम हाती घेतली होती. त्यावेळी एक लाख 37 हजार पाणीमीटर सदोष आढळून आले होते. त्यानंतर आता करसंकलन विभागाने आपला मोर्चा व्यावसायिक नळकनेक्शनधारकांकडे वळवला आहे. त्यानुसार शहरातील तीन हजार 278 व्यावसायिक पाणीमीटर तपासणी मोहीम हाती घेण्यात आली आहे. या तपासणीत मीटरचे काटे बंद असल्याचे समोर येताच 60 जणांना नोटिसा बजावल्या आहेत.
शहरात एकूण दोन लाख 12 हजार नळकनेक्शनधारक आहेत; परंतु यातील 70 ते 80 टक्के पाणीमीटर खराब असल्याचे सर्वेक्षणातून समोर आले आहे. करसंकलन विभागाकडून गेल्या एक वर्षापासून पाण्याची देयके खासगी संस्थेच्या माध्यमातून प्रत्यक्ष घरोघरी जाऊन दिली जात आहेत. त्याचवेळी पाणी मीटरची तपासणी केली जात आहे. 2025-26 या वर्षात मनपाच्या सहाही विभागांतील नाशिकरोड, पंचवटी, नाशिक पूर्व, नाशिक पश्चिम, सातपूर, नवीन नाशिक या विभागातील एक लाख 55 हजार पाणी मीटरची तपासणी करण्यात आली. यावेळी एक लाख 37 हजार मीटर कोणत्या ना कोणत्या कारणाने सदोष असल्याची धक्कादायक माहिती समोर आली. त्यानुसार महापालिकेने संबंधितांना नादुरुस्त मीटर बदलण्यासाठी नोटिसा धाडल्या आहेत. करसंकलन विभागाकडे पुरेसे मनुष्यबळ नसल्याने पुण्याच्या कॅनबेरी संस्थेला पाणी देयके वाटपाचे काम दिले असून, वर्षातून तीन वेळा देयके देण्याची जबाबदारी निश्चित केली आहे.

व्यावसायिक पाणीमीटर बंद आहेत की चालू ते तपासले जाणार आहे. बंद मीटर असल्यास संबंधितांना मीटर बसवण्यासाठी नोटिसा बजावल्या जाणार आहेत. आतापर्यंत साठ जणांना नोटिसा बजावल्या आहेत.
– अजित निकत, उपायुक्त, करसंकलन विभाग, मनपा