सातपूर औद्योगिक वसाहतीत बॅगांच्या कंपनीला आग

पाच लाख रुपयांचे नुकसान

सिडको : प्रतिनिधी
सातपूर औद्योगिक वसाहतीतील एका बॅग उत्पादन करणार्‍या कंपनीला बुधवारी (दि. 24) सकाळी आग लागल्याने सुमारे पाच लाखांंचे नुकसान झाल्याचा प्राथमिक अंदाज व्यक्त करण्यात आला आहे. सुदैवाने या घटनेत कोणतीही जीवितहानी झाली नाही.
सातपूर औद्योगिक वसाहतीतील गणेशनगर रस्त्यालगत टीडीके (इप्कॉस) कंपनीसमोर असलेल्या व्हीथ्री एंटरप्रायझेस या कंपनीत टुरिस्ट बॅग उत्पादनाचे काम केले जाते. बुधवारी सकाळच्या सुमारास कारखान्यातून अचानक धूर निघू लागल्याने परिसरात खळबळ उडाली. काही वेळातच धुराचे मोठे लोळ आकाशात दिसू लागल्याने कर्मचारी व नागरिकांमध्ये धावपळ सुरू झाली. या घटनेची माहिती मिळताच स्थानिक नगरसेवक अंकिता शिंदे, माजी नगरसेवक सलीम शेख तसेच सामाजिक कार्यकर्ते अ‍ॅड. महेंद्र शिंदे यांनी घटनास्थळी भेट दिली.
दरम्यान, कंपनी व्यवस्थापनाने नाशिक महापालिकेच्या अग्निशमन विभागाला माहिती दिल्यानंतर अग्निशमन दलाचे दोन बंब तातडीने घटनास्थळी दाखल झाले. जवानांनी तत्परतेने आग नियंत्रणात आणल्याने मोठी दुर्घटना टळली. आग आणखी पसरली असती तर शेजारील औद्योगिक आस्थापनांनाही धोका निर्माण होण्याची शक्यता होती. आगीत कारखान्यातील काही कच्चा माल, तयार साहित्य व इतर वस्तूंचे नुकसान झाले. पाच लाखांंचे नुकसान झाल्याचा प्राथमिक अंदाज व्यक्त करण्यात आला आहे. आगीचे नेमके कारण समोर आले नसून संबंधित यंत्रणांकडून तपास सुरू आहे.

अग्निशमन दलामुळे अनर्थ टळला
कारखान्यातून धूर निघाल्याची माहिती मिळताच अग्निशमन विभागाचे दोन बंब घटनास्थळी दाखल झाले. जवानांनी अल्पावधीत आग आटोक्यात आणल्याने आग शेजारील औद्योगिक युनिटमध्ये पसरण्यापासून रोखता आली. त्यामुळे संभाव्य मोठे आर्थिक नुकसान आणि गंभीर दुर्घटना टळल्याचे सांगण्यात आले.

Fire breaks out at bag company in Satpur Industrial Estate