सोन्याची खोटी नाणी देऊन पाच लाखांची फसवणूक

तीन संशयित जेरबंद

वणी : प्रतिनिधी
सोन्याची खोटी नाणी (गिन्या) देऊन पाच लाख रुपयांची फसवणूक करणार्‍या टोळीतील तिघा संशयितांना वणी पोलिसांनी शिताफीने ताब्यात घेतले आहे. त्यांच्याकडून संपूर्ण पाच लाख रुपयांची रोकड हस्तगत केली आहे. वणी पोलिसांच्या या कामगिरीबद्दल त्यांचे सर्वत्र कौतुक होत आहे.
पोलिसांकडून मिळालेल्या माहितीनुसार, वणी येथील शिंपी गल्लीत राहणारे 68 वर्षीय दिलीप परशराम मोरे यांच्या घरी संशयितांनी संगनमत करून सोन्याच्या दागिन्यांची बतावणी केली. कापडी पिशवीतील पिवळ्या धातूची खोटी नाणी सोन्याची असल्याचे भासवून ती फिर्यादीस दिली आणि त्याबदल्यात त्यांच्याकडून पाच लाख रुपये रोख रक्कम लाटून फसवणूक केली. याप्रकरणी वणी पोलीस ठाण्यात गुन्हा दाखल करण्यात आला होता. या गुन्ह्याचे गांभीर्य लक्षात घेऊन सहायक पोलीस निरीक्षक हेमंत फड यांच्या मार्गदर्शनाखाली पोलीस उपनिरीक्षक संतोष कडाळे, पोलीस हवालदार मुज्जू देशमुख व पोलीस शिपाई नीलेश तेलंगे यांच्या पथकाने कळवण, देवळा, चांदवड व मनमाड परिसरात शोध घेतला. यादरम्यान, मनमाड शहरात सापळा रचून संशयित महिलांना ताब्यात घेण्यात आले. ताब्यात घेण्यात आलेले संशयित वडोदरा (गुजरात) येथील आहेत. तेजलवेन आनंदबाई वाघीरी (वय 35), श्रद्धावेन धीरूबाई वाघीरी (वय 73), रेखाबेहन अनिलभाई वाघीरी (वय 34), तसेच या गुन्ह्यात पप्पूभाई दुग्लभाई सोवासीया याचाही सहभाग असल्याचे निष्पन्न झाले आहे.

Five lakh rupee fraud involving counterfeit gold coins; three suspects arrested.