फ्लॅट फोडून साडेसात लाखांचे दागिने लंपास

सिडको : विशेष प्रतिनिधी
अंबड परिसरातील दुर्गानगर येथे अज्ञात चोरट्याने बंद फ्लॅटचे कुलूप तोडून घरफोडी करत तब्बल 7 लाख 35 हजार रुपयांचे सोन्याचे दागिने चोरून नेल्याची घटना उघडकीस आली आहे. या प्रकरणी अंबड पोलीस ठाण्यात गुन्हा दाखल करण्यात आला आहे.
पोलिसांनी दिलेल्या माहितीनुसार, दादासाहेब बन्शी लांडगे (वय 40, रा. मोहिनी अपार्टमेंट, दुर्गानगर, त्रिमूर्ती चौक) यांच्या फ्लॅटमध्ये अज्ञात चोरट्याने प्रवेश केला. घराचे कुलूप उघडून घरात प्रवेश करत कपाटातील सोन्याचे दागिने चोरून नेण्यात आले. चोरीस गेलेल्या ऐवजात सोन्याची घोटी, ओमपान पेंडंट, गंठण, लॉकेट, अंगठ्या, कानातले, झुंबर आदी दागिन्यांचा समावेश असून, एकूण मुद्देमालाची किंमत 7 लाख 35 हजार रुपये असल्याचे पोलिसांनी सांगितले.
याप्रकरणी अंबड पोलीस ठाण्यात अज्ञात चोरट्याविरोधात गुन्हा दाखल करण्यात आला असून, वरिष्ठ पोलीस निरीक्षक जग्वेंद्रसिंग राजपूत यांच्या मार्गदर्शनाखाली सहाय्यक पोलीस निरीक्षक विलास पडोळकर पुढील तपास करीत आहेत.

Flat broken into, jewellery worth Rs 7.5 lakhs stolen

Sheetal Nagpure

शीतल नागपुरे या गांवकरी मध्ये डिजिटल विभागात कार्यरत असून, १ वर्षापासून ऑनलाइन वृत्त संकलनाचे काम करत आहेत. त्या पदवीधर असून, त्यांना वाचनाची आवड आहे.