करंजाळीत विहिरीत पडल्याने मुलीचा बुडून मृत्यू

सुरगाणा : प्रतिनिधी
तालुक्यातील करंजाळी येथील तेरा वर्षीय मुलीचा ठक्कर बाप्पा योजनेच्या विहिरीत पडून मृत्यू झाला. सविता शिवाजी भोये (वय 13) असे मृत मुलीचे नाव आहे.
सविता भोये मुखेड (ता. निफाड) येथील आदिवासी आश्रमशाळेत सहावीत शिकत होती. सविताच्या घराजवळ ठक्करबाप्पा योजनेच्या विहिरीचे सुमारे चार वर्षांपासून बांधकाम ठेकेदारामार्फत सुरू आहे. संबंधित ठेकेदाराला ग्रामस्थांनी वारंवार सूचना देऊनही विहिरीचे बांधकाम करीत नाहीत. विहीर सविताच्या घराजवळ आहे. पाय घसरून विहिरीत पडून बुडून तिचा मृत्यू झाला. विहीर खोल असल्याने पाणबुड्यांनी तिला बाहेर काढले. सुरगाणा ग्रामीण रुग्णालयात तिला दाखल केले असता वैद्यकीय अधिकार्‍यांनी तपासून मृत घोषित केले. सविताच्या मृत्यूने परिसरात हळहळ व्यक्त होत आहे.

करंजाळी गावात सुमारे चार वर्षांपासून कळवण प्रकल्पामार्फत ठक्कर बाप्पा योजनेची विहीर फक्त खोदकाम करून ठेवली आहे. तिचे बांधकाम अद्याप पूर्ण न केल्याने मुलीला जीव गमवावा लागला. यापूर्वीही अनेक वेळा गायी, बैल, जनावरे विहिरीत पडले आहेत. अधिकार्‍यांनी सखोल चौकशी करून संबंधित हलगर्जीपणा करणार्‍या ठेकेदारांवर कारवाई करावी.
-शिवाजी भोये, सविताचे पालक